Ekkert rugl

Ekki í sumarfríi

2010-09-16T12:32:00.001+02:00

Brjálað að gera.
Svona er Ísland í dag.

Í sumarfríi - ennþá

2010-08-14T19:08:00.003+02:00

Aftur mætt í foreldrahúsin.
Hér líður tíminn HRATT. Búin að vera í viku og nánast ekkert búin að ná að gera. Nema láta mömmu sauma gardínur, fara smá í berjamó og gróðursetja blóm fyrir utan ríkið.

Í gær hófst bæjarhátíð Héraðsins. Ég bý í gula hverfinu. Við unnum ekki keppnina. Samt er guð í mínu hverfi (kirkjan). Bæði kaþólski og venjulegi guð. Nunnurnar mættu í skrúðgöngu og allt. Speisað að sjá nunnur spásséra með gula hjálma.
Svona er í sveitinni.
Stemming og stuð.

Í sumarfríi

2010-06-30T16:44:00.002+02:00

Vúhú!

Er stödd í foreldrahúsum þessa dagana eftir afstaðið nám ytra. Vantar enn stað að búa á í höfuðborginni, ef einhver er með tillögur að slíku.

Hugmyndin var að hafa það rólegt í foreldrahúsum þessa vikuna, en æsingurinn varð óvart meiri en til stóð. Foreldrarnir drógu mig með út um allar trissur um helgina, og ég fór á 2 tónleika. Gaman að því.
Með foreldrunum fór ég m.a. að skoða hið nýja Alnotahús að Skriðuklaustri. Það er ekki alnota. Í besta falli einnota myndi ég segja: Upplýsingamiðstöð fyrir Vatnajökulsþjóðgarð. Innanhúss var hægt að á upplýsingar og skoða dót tengt svæðinu. En húsið er ljótt að utan og steinsteypa að innan. Var í alvörunni ekki hægt að nota peningana í eitthvað gáfulegra en þetta? Vantaði hús á svæðið?
Nei.
Þetta er bara ljótt og peningasóun.
Ég er hneyksluð.

Foreldrarnir voru bara þokkalega sáttir við að fá mig í heimsókn, en rúmum sólarhring eftir að ég koma á svæðið varð vart við aðeins fleiri gesti innanhúss. Ekki alveg eins velkomna. Þeir gerðu sig heimakomna í þvottahúsinu. Mjög áhugavert var að fylgjast með þessum nýju ábúendum, en þeim var sópað út rúmum einum sólarhring eftir komu þeirra.
Það var semsagt geitungabú í þvottahúsinu. Meindýraeyðirinn sem kom sagðist aldrei hafa séð slíkt innanhúss áður, og var því ákaflega spennandi að fá að taka þátt í útrýmingunni sem sérlegur aðstoðarmaður Flugumannsins. Útrýmingin tók um klukkutíma, og er þetta einn sá mest spennandi klukkutími sem ég hef upplifað í lengri tíma (og örugglega mun meira spennandi en HM-leikurinn sem ég missti af meðan á þessu stóð).

Svona er í sumarfríi.

Auglýsingar

2010-06-04T11:27:00.002+02:00

Auglýsing 1:
Útskriftartónleikar mánudaginn 14. júní. Allir að mæta (sem eru í Osló þann daginn).

Auglýsing 2:
Vantar stað að búa á miðsvæðis í Reykjavík frá ca. 1. júlí.

Júróvisjonvikan

2010-05-27T23:02:00.003+02:00

Missti af júróvisjon á þriðjudaginn.

En sá seinni undanúrslitin í kvöld og varð ÓGEÐSLEGA fúl yfir að Litháen hafi ekki komist áfram.
Var fólk ekki að sjá silfur-nærbuxurnar? Hvernig er hægt að tapa í silfur-nærbuxum?!

Díses. Fólk sem kýs í þessari keppni er bara asnar...

Hlakka til úrslitanna á laugardaginn. Ætla ekki að halda með lélegu lögunum sem komust áfram í dag.

Ópera og júróvisjon

2010-05-22T20:30:00.003+02:00

Þá er enn einn tilbúinn hátíðisdagur runninn upp. Aðfangadagur hvítasunnu.
Allt er nú til.

Afrekaði það í gær að koma inn í nýja óperuhúsið hér í Útlandinu. Kannski ekkert rosalegt afrek. Húsið búið að vera í kortérs göngufjarlægð síðustu árin. Kannski meira afrek að hafa ekki komið þarna inn fyrr.
En ástæðan var ekki af verri endanum. Var boðið á frumsýningu á nýrri norskri óperu. Snobb og frægt fólk. Samt ekkert rosalega mikið af frægum skildist mér. Fullt af venjulegu fólki líka. En mér var bent á nokkra fræga. M.a. konu sem keppti í júróvisjon fyrir löngu. Há, grönn og glæsileg kona. En sagan segir að hún sé ekki með fætur. Hún hefur víst aldrei sést öðruvísi en í síðum kjólum eða pilsum. Kannski er hún hafmeyja...
Ræddi við nokkur tónskáld. Var sem betur fer ekki spurð að því hvað mér fannst um tónlistina þetta kvöldið. Þarna voru nefnilega staddir menn sem ráða því hvort ég fæ að útskrifast úr skólanum í vor, og ég nenni ekki að ljúga til um eigin skoðanir. Stundum er hins vegar alltílæ að halda þeim útaf fyrir sig ef enginn spyr.
Tónlistin í þessari óperu fannst mér ekki uppá marga fiska. Ekkert svo leiðinleg, en ekkert skemmtileg heldur. Aðallega óeftirminnileg. Man ekkert eftir tónlistinni í dag. Og þetta var í gær.
En óperuhúsið er stórt að innan. Svalir á fjórum hæðum í stóra salnum og sviðið risastórt. Þrír fílar í fullri stærð og risavaxinn úlfaldi (örugglega 6 metrar á hæð og önnur hlutföll í samræmi við það) tóku ekki nema lítinn hluta af sviðinu.
Trítlaði aðeins um sviðið eftir æfingu (til að heilsa upp á fræga fólkið og svona), og sá að hliðarsviðið var risastórt líka. Sá aðeins glitta í úlfaldann langt, langt í burtu. Samt var þetta inni. Lofthæðin á sviðinu var líka gígantísk. Nokkuð margir tugir metra.

En að öðru mikilvægara. Júróvisjon.

Í fréttum ríkissjónvarpsins hér í júróvisjonlandi var Íslendingum spáð sigri. Viðtal við íslenska útvarpsstjórann og allt útaf þessu stórmáli. Því hvað gera Íslendingar ef þeir þurfa að halda keppnina nú á þessum síðustu og verstu tímum? Sjitt. Þessi umræða kemur vissulega upp á Íslandi á hverju ári. Litla fólkið frá Íslandi alltaf sigurvisst. En ég hef aldrei séð þessa umræðu í erlendum fjölmiðlum. Og það var ekkert verið að spá neinum öðrum sigri. Sjitt.
Einhver útlenskur kall sagði í þesssari sömu frétt að lönd sem hefðu ekki efni á að halda keppnina ættu einfaldlega ekki að taka þátt. Það finnst mér nú fullgróft. Á þetta þá bara að vera ríkulandakeppni?

Ætlaði að kaupa skó í dag. Kom heim með ljósritunarpappír í 5 litum.
Það er ekki það sama.

17. maí vs. 17. júní

2010-05-17T15:05:00.002+02:00

Í dag er 17. maí, þjóðhátíðardagur Norðmanna.
Ákvað að vera með og fagna deginum að hætti heimamanna.

Dagurinn hófst með hefðbundnum morgunverði í heimahúsi, með allskonar mat og kampavíni og bjór. Löngu fyrir hádegi. Svo var skundað niður í bæ til að kíkja á skrúðgönguna, sem er stór hluti af hinum hefðbundnu hátíðarhöldum. Þar sem mín reynsla af slíkum skrúðgöngum í heimalandinu er nú ekkert sérstaklega góð bjóst ég nú ekki við mikilli skemmtan. En þetta var nú alveg ágætt. Hér eru nefnilega MARGAR lúðrasveitir sem ganga hver á fætur annarri. Sumar með prikstúlkur með í för (það vantar alveg á Íslandi), og önnur hver kona í þjóðbúning. Afar hátíðlegt alltsaman.
Aðalmunurinn á 17. júní hátíðarhöldunum á Íslandi og 17. maí í Norge er kannski að hér virðist fólk vant því að vera innan um margt fólk og hagar sér samkvæmt því. Skrúðgöngunni var t.d. þannig skipt upp að fyrst kom fánaberi lúðrasveitar, svo kom lúðrasveitin og síðan gekk fólk í hæfilegri fjarlægð fyrir aftan lúðrasveitina. Þá kom fánaberi næstu lúðrasveitar, lúðrasveitin, og svo fólkið. Og þannig koll af kolli. Virkar svo einfalt.

En ekki á Íslandi.

Í 17. júní skrúðgöngu er löggan fyrst, þá skátarnir og svo lúðrasveitin. Allt í lagi með það. En svo kemur fólkið. Ekki í hæfilegri fjarlægð fyrir aftan lúðrsveitina, heldur flækist fyrir inná milli lúðrasveitaraðanna.
Af hverju? Af hverju ekki bara fyrir aftan eins og hér í Útlandinu?
Fólk virðist alls ekki átta sig á því hve lítið sniðugt það er þegar lítil börn flækjast fyrir fótum fólks með lúður. Fólk með lúður á oftar en ekki engan séns á að sjá niður fyrir lappirnar á sér. Það er jú með lúður. Stundum stóran lúður. Og þarf að horfa á nóturnar sínar.
Á Íslandi skilur fólk þetta ekki. Mörgum finnst voða sætt að sjá börnin sín hlaupa um allt öskrandi með blöðrur. Ég efast hins vegar um að þessu sama fólki finnist sniðugt að sjá þessi sömu börn troðast undir fótum lúðrasveitar. Lúðrasveitin getur ekki bara fært sig ef það er krakki fyrir, því hún sér hann ekki.
Nú hefur undirrituð oftar en ekki spilað á stóran lúður á 17. júní, sem þýðir að ég labba aftast í lúðrasveitinni. Á hverju einasta ári þegar ég hef tekið þátt, hef ég hrasað um krakka og fengið blöðru í andlitið. Það er ekki gaman að vera næstum dottinn um krakka með 20 kílóa lúður í fanginu. Og ef maður dettur fram fyrir sig er lúðurinn ónýtur. Hann kostar minnst milljón miðað við gengi dagsins.
Það er heldur ekki sniðugt að fá blöðru í andlitið þegar maður er að spila. Þá sér maður ekki neitt. Það er líka voða erfitt fyrir íslendinga að skilja. Ef þú labbar með barn með blöðru við hliðina á lúðrasveit. Hvert fýkur þá blaðran?
Svo þykir mér nú bara almenn kurteisi að ganga á eftir lúðrasveitum í skrúðgöngum. Þannig er þetta gert í útlöndum og þykir ekki flókið mál.

Ég er allavega mjög fegin að sleppa við 17. júní þetta árið. Það er ekki í uppáhaldi að þurfa að díla við tillitslausan almúgann þann daginn.
Með lúður.

Rugl

2010-05-09T11:27:00.003+02:00

Búið að vera rugl mikið að gera síðustu vikurnar.
Vikurnar þar áður var rugl lítið að gera.
Held það sé skárra að hafa rugl mikið að gera. Þegar maður hefur rugl lítið að gera endar það í óhóflegri leti = sjónvarpsglápi í óhófi.

Nú er að hefjast síðasta kennsluvikan í þessu blessaða námi. Tími til kominn. 4 ár í námi sem fjallar meira eða minna um suð er sennilega ekki það gáfulegasta... en ég virðist allavega vera að klára þetta. Niðurstaðan er: Fólk ætti frekar að semja lög en suð. Suð er nefnilega leiðinlegt.
Á morgun er skiladagur fyrir síðustu verkefni í þremur fögum. Á þriðjudaginn í einu. Og á föstudaginn er skiladagur fyrir tónsmíðamöppur. Fyrir þann dag þarf ég að skila þremur eins möppum. Í hverri möppu eiga að vera ca. 120 blaðsíður af nótum og tilheyrandi, og tveir geisladiskar. Þessa vikuna verð ég semsagt að ljósrita og gorma. Je.

Tónleikar með lúðró á miðvikudaginn. Skemmtileg lög. Allir að mæta.

Í næstu viku hefjast svo æfingar fyrir risa-útskriftartónleikana mína. Þeir vera 14. júní. Ca. 70 manna lúðrasveit, 3 einleikarar og Steindór Andersen. Allir að mæta.

Best að halda áfram með verkefni vikunnar.

Af fréttaflutningi Útlendinga

2010-04-18T13:40:00.002+02:00

Það er eldgos.
Nánast ekkert annað hefur verið í fréttum hér ytra síðustu daga. Kannski ekkert skrítið. Norðmenn ferðast mikið og nú er ekkert hægt að fljúga.
Útlendingum þykir líka ákfalega mikilvægt að dramtísera fréttir óhóflega. Nú er fjallað um mögulegar eiturgufur og það að Íslendingar bíði skjálfandi á beinunum eftir Kötlugosi. Á íslenskum fréttamiðlum er lítið sem ekkert hægt að finna um eiturgufur og Kötlugos. Hvaðan fá þessir Útlendingar sínar hugmyndir eiginlega? Hér er semsagt allt gert til að búa til múgæsing. Ég reyni að láta lítið á mér bera, því spurningar sem maður fær sem Íslendingur á förnum vegi eru beinlínis fáránlegar. "Er ástandið ekki alveg hræðlegt á Íslandi?" eða eitthvað álíka. Margir sennilega sannfærðir um að íslenska þjóðin sé að deyja úr eiturgufum og Kötlugosi.
Þvílíkt bull.
Svo eru aðrir sem finnst pínu kúl að það sé ekki hægt að fljúga. Minnir fólk á að sumir hlutir eru ekki sjálfgefnir.
Annars held ég að fólk sé dáldið fegið að það sé yfirleitt eitthvað í fréttum. Hér ríkir eilíf gúrka. Fyrir nokkrum vikum var aðlafréttin buxur krullu-liðsins (krulla er íþróttin þar sem einn maður kastar einhverju drasli á svelli og hinir í liðinu sópa). Nýju buxur liðsins voru með marglitu blómamunstri, en þóttu ekki nógu norskar í útliti til keppni á erlendri grundu. Þetta var margra daga frétt. Buxur skipta máli í heimi krullu. Greinilega stórfrétt hér á ferð.

Annars er ekkert margt að frétta. Ein vika búin af skólanum eftir páskafríið. Og svo kemur frívika. Einhver risa-alþjóðleg fiðlukeppni í skólanum. Verður reyndar eitthvað minni en upphaflega var áætlað. Sumir keppendur komast ekkert á staðinn útaf einhverju eldgosi = ekkert flogið.

Mitt markmið er að vera ekki ótrúlega löt í frívikunni. Margt sem þarf að gera, en líka mikið frí = nógur tími. Lúxusvandamál.

Af páskum Útlendinga

2010-04-01T13:46:00.002+02:00

Norðmenn eru sennilega heimsmeistarar í páskum.

Langflestir eru í 10 daga páskafríi, sem hefst pálmasunnudagshelgina og líkur annan páskadag. Þeir eru með skírdag, föstudaginn langa, páskadag og annan í páskum eins og við hin. Til viðbótar eru þeir búnir að finna upp "aðfangadag páska", sem er þá laugardagurinn fyrir páska, og dagarnir þrír fyrir skírdag eru kallaðir "páskavika". Heyrði í útvarpinu talaðu um "páskamiðvikudag" sem er þá miðvikudagurinn fyrir páska.

Í Noregi eru líka mjög skírar reglum um hvað er gaman að gera um páska.
Hér er tæmandi listi yfir það sem Norðmenn gera um páskana:
-Fara í hyttu uppí fjall
-Gönguskíða
-Lesa glæpasögur
og ef fólk einhverra hluta vegna kemst ekki í hyttu uppí fjalli um páskana, og verður að vera í bænum, þá er rauði krossinn til taks til aðstoðar því ógæfusama fólki.

Norðmenn eru spes lið.

Með öndina í hálsinum

2010-03-30T15:52:00.002+02:00

Um helgina kom það fram í sjónvarpsfréttum hér ytra að Íslendingar biðu með öndina í hálsinum eftir yfirvofandi Kötlugosi. Samkvæmt mínum áreiðanlegu heimildum (feisbúkk) bar nú ekki mikið á þeirri önd. Fólk virtist hins vegar keppast um að komast sem næst eldgosinu á Fimmvörðuhálsi.

Undarlegt þegar fjölmiðlar greina frá yfirvofandi hættuástandi í öðrum löndum, en minnast varla á hættuástand í eigin landi.
Hér í borg hefur verið stórhættulegt að vera á ferli nánast allan marsmánuð. Ástæðan er snjó- og klakaflóðahætta af húsþökum. Nokkrum sinnum varð ég vitni af slíkum flóðum, oft á fjölförnum gangstéttum, og ávallt var bara heppni að enginn varð undir.

Nú er snjóflóðahættuástand liðið hjá, en ég verð að viðurkenna að öndin var ekkert langt frá hálsinum þennan mánuð sem hættuástand varði.

Vorið nálgast óðfluga.
Opinber dagsetning vor-upphafs í Útlöndum er 1. apríl.

Páskafrí!

2010-03-27T11:48:00.002+01:00

Jeij!!

Hef sjaldan verið jafn ánægð með að komast í frí, og örugglega aldrei verið jafn stressuð í marga daga. Það er stress að halda tónleika, en þeir gengu vel og nú veit ég margt um tónleikahald í skólanum sem ég vissi ekki fyrir. Vitneskja sem kemur sér afar vel fyrir aðal-útskriftartónleikana í júní. Sé að mörgu leyti fram á mikið minna stress fyrir þá tónleika.

Það gekk líka vel í lúðrakeppninni í Þrándheimi. Urðum í 4. sæti af 89. Fyrir utan hvað það var rosalega gaman í Þrándheimi, að venju.

Mitt fyrsta verk í páskafríi var að sofa. Lengi. Kom heim úr skólanum í gær um hádegi og svaf í 3 tíma. Vaknaði bara af því að vekjaraklukkan hringdi. Fór á tónleika, kom heim og fór að sofa. Svaf 12 tíma í nótt. Það er greinilega þreytandi að vera stressaður lengi.

Nú er hið langþráða páskafrí komið. Hef reyndar búið til langan lista yfir allt sem þarf að gera í fríinu, en sá listi inniheldur að mestu hluti sem ég get gert í rólegheitum heima hjá mér, eða í skólanum = tjill, en samt eitthvað gert af viti. Fullkomið.

Á morgun breytist klukkan. Mjög fín helgi til að missa af klukkutíma, nú þegar það er páskafrí og klukkutími til eða frá skiptir svosum engu.
Á morgun verð ég semsagt komin 2 tímum á undan ykkur kæru landsmenn.

Gleðilegt páskafrí!

Lúðr og tónleikar

2010-03-18T12:23:00.004+01:00

Nú stendur yfir hin árlega lúðrakeppnisvika hér í landi lúðrasveitanna. Um síðustu helgi var Óslóarkeppni í lúðrasveiti. Við unnum. Í gær voru æfingatónleikar í nágrannasveitafélagi og á morgun verður haldið til Þrándheims, hvar att verður kappi við helstu lúðrasveitir landsins. Svo er auðvitað ofur-lúðrpartý með hátt í 2.000 lúðranördum á laugardagskvöldið í Þrándheimi. Það hefur hingað til verið magnað.
Jól lúðanna.

Er annars á fulllu að undirbúa 1. hluta útskriftartónleikanna minna (svona þegar ég er ekki að lúðra) sem haldnir verða í næstu viku. Dáldið rosalega mikið stress. En ég reikna fastlega með frábærum tónleikum.

Tónleikar fimmtudaginn 25. mars kl. 19.30. Í Noregi.
Allir velkomnir!

Lausnin á æseif

2010-03-07T17:31:00.004+01:00

Komin aftur til Noregs og búin að ná upp töpuðum svefni. Það er erfitt að vaka heila nótt. Þá verða tveir dagar að einum og það er eitthvað rangt við það.

Í gær voru kosningar. Ég kaus reyndar ekki neitt. Nennti ekki að kynna mér almennilega hvað var verið að kjósa um, og fólkið á götunni talaði um að betri samningar væru í vændum. En hver veit það?

Skil annars ekkert hvað fólk er að pælí þessu æseif-máli endalaust. Lausnin er einfaldari en allt. Við gerumst hluti af Noregi. Nánast allir þeir Norðmenn sem ég hef hitt, og hafa vakið máls á efnahagsástandi Íslands, hafa komið með þessa tillögu. Nokkrum finnst þó eðlilegra að Noregur verði hluti af Íslandi, þar sem allir "kúlustu" Norsararnir hafi farið þangað á sínum tíma.

Ef einhver efast um að Noregur ráði við að greiða skuldir Íslendinga, þá heyrði ég eftirfarandi staðreyndir í fréttum hérlendis fyrir helgi:
Hagnaður Noregs af olíusjóðunum árið 2009 voru um 1.000.000.000 norskra króna (ca. 22.000.000.000 íslenskra). Á DAG!
Og þetta er bara hagnaðurinn. Enginn veit hvursu stórir þessir olíusjóðir eru, en það eru örugglega nokkuð mörg núll í því. Noregur gæti semsagt borgað allar skuldir Íslendinga með ca. eins mánaðar hagnaði olíusjóðanna.

Lausnin er því einföld. Verum með í Noregi. Eða fáum Noreg til að vera með í Íslandi. Þeir eru örugglega til í annað hvort. Þá þyrfti enginn að pæla meir í æseif. En hvað myndu Íslendingar þá tala um? Það hefur varla verið talað um annað svo lengi sem elstu menn muna... Kannski vilja Íslendingar ekki finna neina lausn. Þá hafa þeir ekkert að tala um lengur.

Ferðalag

2010-02-17T09:50:00.000+01:00

til Íslands á eftir.
Verð þar í 2 vikur.
Sjáumst

Helgi

2010-02-07T13:48:00.002+01:00

Þá sér fyrir endann á eina helgarfríi þessa mánaðar. Það var vel nýtt í tónsmíð. Hinar þrjár helgarnar fara í lúðr. Sýnist mars líta eins út. Ein helgi í frí, og hinar í lúðr.

Tvennt frá Finnlandi:

Sá söngleikinn Fame fluttan af leiklistarnemum Lahti. Væntingar voru ekki miklar, þar sem ég skil ekki finnsku og þóti ekki líklegt að bær á stærð við Lahti hefði úr miklu að velja þegar kæmi að góðum leikurum (já, fordómar). En vá hvað þetta var frábærlega vel gert! Allir 42 leikararnir gátu bæði sungið, dansað og leikið. Og ég skildi alveg helling, þó ég skilji ekkert í finnsku.

Síðasta daginn á viðskiptanámskeiðinu kom þýsk kona til að leggja mat á námskeiðið. Frau Bierenkrauz. Ákaflega viðeigandi að fá Þjóðverja til að sjá til þess að allt fari rétt fram á síðasta degi. Allir hóparnir áttu að vera með 15 mínútna kynningu á sínu verkefni. Og þegar Þjóðverjar eru annars vegar eru 15 mínútur, 15 mínútur. Hvorki meira né minna. Allavega alls ekki meira! Þegar 5 mínútur voru eftir af tímanum veifaði hún blaði þar sem á var ritað stórt, bleikt 5. Og þegar tíminn var liðinn fór á loft stórt, bleikt STOP. Þjóðverjar eru magnaðir.

Þetta var Finnland.

Nú er ég í Noregi.

Í gær var júróvisjondagur. Horfði á úrslitin í Noregskeppninni. Þarlendum tókst aldeilis að kúka í buxurnar með því að kjósa laglausan homma til að taka þátt í aðalkeppninni, frekar en töff þungarokkara með eld á sviðinu. Bjánar.
Íslendingar verða allavega örugglega ofar en Norðmenn þetta árið.

Í gær var líka dagur Samanna.
Til hamingju með gærdaginn Samar.

Aftur í Norge

2010-02-04T19:31:00.002+01:00

Jæja, þá er maður kominn heim til sín, til alveg tveggja vikna dvalar, eftir ákaflega lærdómsríka daga í Finnlandi.

Eitt af mínum fyrstu verkum eftir heimkomuna var að halda eins og hálfs klukkutíma fyrirlestur. Um MIG.
Það var magnað.
Allir voða ánægðir með fyrirlesturinn, jafnt kennarar sem nemendur. Og sjálf skemmti ég mér konunglega. Er að hugsa um að leggja þetta fyrir mig. Bjóða mig fram sem gestafyrirlesara í ýmsum skólum og tala bara um MIG. Get varla verið lélegri í því en margir þeirra gestafyrirlesara sem ég hef séð á mínum námsferli hér í Norge, sem margir hafa verið útlendingar (oft Þjóðverjar) lítt talandi á ensku og muldra eitthvað óskiljanlegt. Auk þess að hafa oft augljóslega ekki skipulagt sig neitt áður en fyrirlesturinn hefst.
Jebb, það gæti ég gert.

En nú verður tekist á við hversdagsleikann í tvær vikur.
Einn, tveir og byrja.

Enn í Finnlandi

2010-01-31T19:26:00.003+01:00

Þá er ég búin að dvelja í Finnlandi í eina viku og einn dag, og líður soldið einsog ég hafi búið á hóteli hér í Lahti alla ævi. Mikið og stíft prógramm alla daga, þannig að maður er orðinn ansi rækilega þreyttur.
Í dag var hitastigið komið upp í -1 gráðu. Alveg hitabylgjuveður miðað við hvernig veðurfar hefur verið síðustu vikuna. Sennilega í fyrsta skipti sem mér hefur fundist frost og snjókoma verulega gott veður.
Þá er komið að hinni hefðbundnu tómstund á fríkvöldi í Finnlandi. Spila á spil.

Í Finnlandi

2010-01-27T20:27:00.002+01:00

er kalt.

Einmitt þegar hitastigið í Norge var orðið vel þolanlegt (einungis nokkrar gráður í mínus), var maður sendur í 25 stiga frostið hér í Lahti. Þegar horið frýs hratt og örugglega í nösunum á manni lengst uppí nefinu, þá eru greinilega meira en 20 gráður í mínus. Og þannig er það búið að vera síðan ég kom hingað á laugardaginn. Samkvæmt spám er gert ráð fyrir að hitinn fari upp fyrir -10 um helgina. Það verður nú hlýtt og notalegt. Það er mun meiri munur á -20 og -10 en ég hélt.
Þetta voru helstu fréttir af veðri.

Annars er það helst að frétta að það er fáránlega mikið að gera á þessu námskeiði sem ég var send á hérna í Finnlandinu. Erum í skólanum frá 10-18 alla þá daga sem hér er dvalið (förum til baka á miðvikudaginn), og þar fyrir utan eru einhver verkefni sem þarf að gera og fólk sem þarf að tala við. Ekkert djók sko. Og þetta er námskeið í viðskiptum... eða eitthvað þannig. Þetta fer í meginatriðum þannig fram að maður var í upphafi settur í hóp með 6 ókunnugum, og á einni viku eigum við að búa til vöru eða þjónustu, sem við eigum svo að selja einhverjum alvöru aðila (ekki tilbúnum viðskiptavini). Hvernig þetta kemur mínu eiginlega námi við er óljóst, en ég ákvað að líta á þetta sem ágætis tilbreytingu (jákvæðnin í farteskinu) og geri nú viðskipta- og markaðsáætlanir í samvinnu við fólk sem hefur vit á svoleiðis hlutum.
Norski hópurinn var með tónleika í gær. Þar var m.a. frumflutt 1 eftir mig. Gekk rosa vel. Afskaplega flinkir hljóðfæraleikarar og söngvarar með í för.

Hér er semsagt ágætlega gaman, en alltof kalt og alltof mikið að gera.

Er þess vegna ekki búin að drekka neitt vodka (en soldið af bjór reyndar) og ekki búin að fara í neitt sána (en bún að komast að því að í Finnlandi eru 2.000.000 sánu á þessa 5.000.000 manns sem hér búa).

Til Finnlands

2010-01-22T14:21:00.003+01:00

jáókei
ég næ ekkert ad gera allt í thessari viku.

Á morgun er thad Finnland, hvar ég mun dvelja í 11 daga. Ef einhver tharf naudsynlega ad ná símasambandi vid mig verd ég væntanlega med íslenska númerid. Svo held ég ad thad sé líka internet í Finnlandi.

Allt að gerast

2010-01-16T22:24:00.002+01:00

Jæja já og jæja

Hélt einhvernvegin að það yrði minna að gera svona síðustu önnina í þessu blessaða námi. Það virðist hafa verið misskilningur.

Þetta þarf ég að gera í vikunni:

-Tónsmíða 1 flautukonsert
-Mæta í skólann
-Læra heima (ekki í forgangi)
-Æfa með Finnlandsförum
-Hitta slagverksleikara
-Hitta klarinettuleikara
-Æfa með lúðrasveitinni
-Skrifa nokkrar umsóknir
-Gera byltingu
-Fara til Finnlands

Best að drífa í þessu.

Er kalt?

2010-01-09T18:44:00.002+01:00

Já.

Hef komist að hver helsti munurinn á 10 stiga frosti og 20 stiga frosti er. Horið frýs helmingi hraðar í nösunum á manni í 20 stiga frosti. Svo er líka dáldið kalt inni.

Soldið bjánalegt að flytja frá köldu landi til ískalds lands, en þetta er nú ekkert alslæmt. Það er t.d. ekki rok og frekar bjart yfir, svona yfir hádaginn allavega. Og hér talar fólk ekki miki um æseif. Sá nú samt Steina fjármálaráðherra í fréttunum hérna í gær. Hann var m.a. spurður að því af fréttamönnum, af hverju almenningur á Íslandi ætti að borga fyrir klúður nokkurra manna. Hann svarði: "Lífið er ekki alltaf réttlátt". Gott svar.

Er annars búin að gera fullt síðan ég kom, og ekkert bólar á eftirjólaþunglyndi. Sennilega sökum annríkis. Mætti voða mikið í skólann í vikunni og spilaði á tveimur jólatréskemmtunum. Þar af annarri í fjármálaráðuneytinu.

Ár ferðalaga

2010-01-06T12:39:00.003+01:00

Þá er komið nýtt ár. Til hamingju með það.
Á slíkum tímamótum er við hæfi að líta aðeins yfir nýliðið ár. Þegar ég hugsa til baka finnst mér eitt hafa einkennt þetta ár í mínu lífi umfram annað. En í þessu tilviki er 1 = margt:
Ferðalög.
Og þá hefst tölfræðileg samantekt á ferðalögum ársins 2009.

Lönd sem dvalið var í:
Noregur = 171 dagur eða 47%
Ísland = 138 dagar eða 38%
Bandaríkin = 37 dagar eða 10%
Svíðþjóð = 7 dagar eða 1,9%
Ítalía = 5 dagar eða 1,3%
Þýskaland = 4 dagar eða 1%
Tékkland = 3 dagar eða 0,8%
+ 1 millilending í Danmörku

Flugferðir milli landa = 13
Lestarferðir milli landa = 3

Fjöldi gististaða = 37
(hér er átt við fjölda borga/bæja/sveita sem gist var í)

Tókst síðastliðið sumar að ferðast um nánast allt Ísland. Þessi svæði voru heimsótt:
-Austurland
-Uppsveitir Suðurlands
-Vestmannaeyjar
-Höfuðborgarsvæðið
-Snæfellsnes
-Flatey
-Vestfirðir, tvisvar
-Norðurland
-Miðhálendið

Eins tókst mér að rúnta um stóran hluta Bandaríkjanna, en það hef ég talið upp áður og nenni ekki að gera það aftur.

Þetta ár virðist ætla að byrja á sipuðum nótum. Er búin að fara eina ferð milli landa, og sú næsta er fyrirhuguð eftir 17 daga, þegar Finnland verður heimsótt. Í eina 12 daga skilst mér.

Fleiri gagnlegar upplýsingar

2009-12-18T15:32:00.003+01:00

Ætla að koma með aðeins fleiri upplýsingar varðandi breytingar á Héraði.

-Apótekið er flutt niðrí Kaupfélag. Gamla apótekinu hefur verið breytt í kaþólskt bænahús, og þar á efri hæðinni búa víst tvær nunnur.

-Skattstofan er til sölu. Á góðu verði, samkvæmt áreiðanlegustu heimildum (Dagskránni). Ekki oft sem hægt er að kaupa skattstofu á góðu verði. Ný skattstofa ku vera til húsa á leið innað mjólkurstöð (á svipuðum slóðum og ljósabúðin var).

-Í nýjustu Dagskránni sá ég ekki betur en Kaupfélagsskrifstofurnar væru líka til sölu. Örvæntið eigi, Kaupfélagið er enn á sínum stað (þó það heiti eitthvað annað), með nýtilkomnu apóteki innaborðs.

-Í þessari sömu Dagskrá sýndist mér líka að flytja ætti tjaldstæðið. Veit ekki hvurt, enda skiptir það engu máli á þessum árstíma. Það er örugglega lokað hvar sem það er staðsett.

Eitt er alltaf mikilvægast þegar dvalið er á Héraði:
Að lesa Dagskránna.
Það hefur ekki breyst.

Sorp

2009-12-15T13:56:00.003+01:00

Þá er ég komin á Austurlandið eftir viðburðaríkar vikur í höfuðborginni.

Austurlandið er fínt, en hér koma mikilvæg skilaboð til þeirra sem hyggjast heimsækja Egilsstaðaborg á næstunni:

Kynnið ykkur sorpflokkunarkerfi bæjarins áður en haldið er af stað. Ég kom hingað í gær og fékk í hendurnar rúmlega tuttugu síðna bækling um flokkkun sorps. Og komst að því að það er engan vegin nóg. Hef allavega hugsað mig nokkuð oft um áður en ég hendi nokkrum sköpuðum hlut í ruslið. Og oftar en ekki hefur bæklingurinn ekki getað hjálpað mér.

Hér koma smá upplýsingar um flokkunarkerfið.
Það eru í gangi 3 ruslatunnur:
-Brún tunna fyrir lífrænan úrgang.
Sú tunna er nánast eingöngu fyrir matarleifar. Einfalt. Allt rusl sem fer í þá tunnu á að fara í sérstaka lífræna poka. Það má líka setja tepoka í þessa tunnu. En ég hef ekki getað fundið út hvort það megi setja bréfið utan af tepokanum með...
-Græn tunna fyrir endurvinnanlegan úrgang.
Hér vandast málið. Pappír fer í þessa tunnu. Sumur pappír á að fara í glæran poka, en annar pappír ver beint í tunnuna. Hér má líka setja ýmsar umbúðir, en það þarf að passa að þrífa þær vel. Matarleifar, hreinsiefni og annað innan í umbúðum má alls ekki fylgja með í tunnuna. Þetta þýðir því uppvask á ýmsu rusli. Lok af glerkrukkum mega fara í tunnuna, en ekki krukkan sjálf. Hún fer í gráu.
-Grá tunna fyrir allt annað.
Fyrir allt venjulegt rusl (hvað sem það nú er).

Fékk kvef við komuna hingað og veit ekkert hvar má henda snýtubréfunum.
Möguleiki 1: Í grænu tunnuna með öðrum pappír. En á þetta þá að fara í poka í tunnuna eða ekki?
Möguleiki 2: Í brúnu tunnuna. Hor er örugglega lífrænn úrgangur.
Möguleiki 3: Í gráu tunnuna.

Er að hugsa um að fá mér vasaklúta. Þetta eru alltof mikil heilabrot þegar maður er með kvef.

Ísland á morgun

2009-11-26T22:45:00.000+01:00

sjáumst þar

Vikurnar

2009-11-20T19:46:00.001+01:00

halda áfram að þjóta hjá.
Ein vika í jólafrí.

Gormun

2009-11-18T16:22:00.001+01:00

Í dag lærði ég á gormunarvél.
Mögulega hápunktur skólaársins.
Í framtíðinni mun ég eingöngu sækja um vinnur sem gormunarsérfræðingur.

Vikurnar

2009-11-13T15:19:00.001+01:00

bókstaflega fljúga hjá.
Tvær vikur í jólafrí.

Skrifstofustörf

2009-11-06T20:34:00.002+01:00

eru góð skemmtan.
Það er gaman að ljósrita
Það er gaman að setja ótrúlega mörg bréf í umslög
Það er gaman að raða endalaust mörgum reikningum í kennitöluröð
Það er gaman að setja blöð í möppur
... og svona mætti lengi telja
EN
að skrifa umsóknir er EKKI góð skemmtan, og SJITT hvað það getur tekið langan tíma

Vetur

2009-11-05T15:05:00.004+01:00

Í gær sá ég þrjú snjókorn.
Í dag sá ég dáldið fleiri snjókorn.
Þá er formlega kominn vetur.
Og þá koma bráðum jól.
Rétt rúmlega þrjár vikur í jólafrí.
Og fimmtíuogþrír dagar í þrítugsafmæli.

Vetur?

2009-11-01T22:01:00.002+01:00

Yfirleitt mætir veturinn í Útlandinu stundvíslega 1. nóvember. Ekkert bólar hins vegar á honum þetta árið.
Veðurspá næstu vikuna: Rigning
Það er semsagt enn haust um ófyrirséða framtíð.

Er hálfnuð með önnina. Þessi önn er afar stutt frá mínum bæjardyrum séð. Skóli í 3 vikur. Frí í eina (vikuna sem byrjar á morgun). Og svo aftur skóli í 3 vikur. Þá er komið jólafrí.
Áætluð koma til Ísalands: 27. nóvember.

Það er eitthvað að gera í skólanum. Samt ekkert svo mikið. Aðallega er maður að brasa við að klára að semja allt fyrir lokatónleika. Stefnan er að klára það fyrir áramót, og nota síðustu önnina til að tjilla... eða eitthvað.

Það er líka eitthvað að gera í lúðrasveit. Spiluðum í afþreyingarkeppni í gær. Skemmtum okkur ákaflega vel. Settum höfuðáherslu á búninga og sviðsframkomu, þar sem æfingar á tónleikaprógramminu voru í færra lagi. Þrjár. Það virkaði ágætlega. Lentum í 2. sæti. Ég spila semsagt í næstskemmtilegustu lúðrasveitinni í Útlandinu.
Næstu tónleikar eru eftir 2 vikur. Og 3 æfingar. Ekkert verið að spandera alltof mörgum æfingum fyrir hverja tónleika.

Þetta var skýrsla dagsins.

ó, hið daglega líf

2009-10-24T18:43:00.001+02:00

hve dásamlegt það er.

Gleðilegan vetur!

Ferðalok og heimkoma

2009-10-17T17:48:00.002+02:00

Eftir Ammríku var hugmyndin að skella sér til Vestmannaeyja á lúðramót. Af því varð ekkert vegna veðurs. Herjólfur fór ekki til Eyja í næstum 2 sólarhringa, og voru því í einangrun einmitt á því tímabili sem ætlunin var að flytja hátt í þúsund lúðramanns til eyja. Var auðvitað arfafúl út í þetta vitlausa veður. Allt slagverkið og stóru hljóðfærin fengu hins vegar að fara til eyja, og koma til baka, ónotuð.
Í stað eyjaferðar gat ég gert smá gagn og passað tvö smábörn. Það gerði ég alein í heila 5 klukkutíma, og enginn fór að grenja að neinu ráði. Þetta verður að teljast ótrúlegur árangur. Skemmti mér ákaflega vel við að lita og horfa á múmínálfana.

Nú er ég komin heim til mín og farin að mæta í skólann. Kannske ekki seinna vænna. Búin að mæta í nokkra tíma og sýnist ég ekkert hafa misst af neitt miklu, en hins vegar misskilið innihald sumra faganna.
Mætti t.d. í skólann eldsnemma á föstudagsmorguninn vitandi að ég ætti að gera eitthvað með dönsurum. Í einfeldni minni hélt ég að dansararnir ættu að dansa eitthvað og tónlistarfólkið ætti að finna/búa til tónlist í samvinnu við þá. Í ljós kom að allir áttu að hreyfa sig eitthvað.
Dansararnir voru þarna semsagt aðallega til að láta tónlistarhlussurnar hreyfa sig. Ég get nú ekki kallað hreyfingu dagsins dans, en gaman var það. Á einum tímapunkti brutust út hópslagsmál upp á stólum. Það endaði á því að tónsmíðaleiðbeinandi datt á rassinn niður á gólf. Dansara varð þá að orði: "Þú verður að passa dreyfingu líkamsþyngdarinnar".
Ég myndi nú segja að þumalputtareglan væri sú að það er hættulegt að slást uppá stól. Og örugglega bannað. En greinilega ekki ef maður er dansari.

Ferðalög

2009-10-14T16:46:00.001+02:00

Þá er komið að stuttu landfræðilegu yfirliti yfir ferðina mína til Ammríku. Heimsótti alls 20 fylki á rúmum fjórum vikum sem verður að teljast afbrags árangur. Sum þeirra voru meira að segja heimsótt oftar en einu seinni.
Hér verða upp talin þau fylki sem heimsótt voru, hversu oft (í sviga) og í hvaða borgum og bæjum var stoppað til að spila og/eða sofa:

-Washington (x2): Seattle, Tacoma, Spokane
-Idaho (x1)
-Montana (x1): Bozeman, Billings, Miles City
-North Dakota (x1): Oaks
-Minnesota (x1): Minneapolis
-Wisconsin (x3): Sveitin, Madison, Racine, Oshkosh
-Michigan (x1): Detroit
-Indiana (x3)
-Illinois (x4): Chicago
-Ohio (x2): Cleveland
-Pennsylania (x2): Pittsburgh
-New Jersey (x2)
-New York (x1): New York
-Iowa (x1)
-Nebraska (x1): Omaha
-Colorado (x1): Denver
-New Mexico (x1)
-Arizona (x1): Phoenix
-California (x1): San Diego, Los Angeles, San Francisco
-Oregon (x1): Portland

Þá er það upp talið.

Þetta var nú alveg töluvert ferðalag og voða gott að vera komin heim til sín í hversdagsleikann. Í heilar 6 vikur eða svo. Þá er komið jólafrí.

Í dag barst mér svo tölvupóstur þess efnis að ég ætti að fara til Finnlands í janúar/febrúar að taka þátt í .... einhverju á vegum skólans. Það er greinilegt að fólkinu í skólanum finnst betra þegar ég er einhversstaðar annarsstaðar en þar. Mér sýnist á öllu að þetta ...... dæmi eigi að taka alveg meira en viku.
Og nú ætla ég að fara að lesa gamla tölvupósta og gá hvort ég verði einhvers vísari um þetta Finnlandsdæmi. Rosa gaman að fá að taka þátt í svona ..... bara einhverju.

Komin

2009-10-12T19:09:00.001+02:00

heim til mín. Loksins.

Búin að vera heima hjá mér í 2,5 vikur undanfarna 5 mánuði. Það verður að teljast frekar lélegur árangur. Markmið næstu daga og vikna er að vera miiikið heima að læra og koma lífinu í einhverja rútínu.

Kominn tími til.

Á byrjunarreit

2009-10-06T18:11:00.002+02:00

Þá er ég komin aftur til Seattle. Ferðalagið endaði alveg eins og það byrjaði. Með grillaðri svínsöxl og bjór frá honum Hale (Hale´s Ale).

Legg af stað út á flugvöll eftir smástund, hvaðan skal flogið beinustu leið til Íslands.

Rokk!

2009-10-02T23:41:00.002+02:00

Suðvesturhorn Bandaríkjanna er tvímælalaust það mest framandi hingað til. Í Nýju Mexíkó eru borgir ósýnilegar. Maður sér bara skilti sem gefur til kynna að þar sé borg, en húsin eru alveg eins á litin og klettarnir og eru því ósýnileg mannlegum augum. Í Arizona eru eyðimerkurkaktusar. Alveg eins og í teiknimyndum. Og í Californiu eru pálmatré. Keyrðum meðfram landamærum Mexíkó. Þar er vel fylgst með því að Mexíkóar séu ekki að svindla sér yfir landamærin. Keyrðum framhjá 3 landamæravarðastöðvum og þurftum að gera grein fyrir ferðum okkar. Þó við værum ekkert að fara til Mexíkó. Spes.

Nú er ég í Los Angeles. Þar býr fræga og ríka fólkið. Fór á Santa Monica ströndina í gær. Sá enga strandverði hlaupandi um í rauðum sundfötum. Svik! Rúntuðum líka um Beverly Hills og Hollywood. Greinilega ekki fátækt fólk sem býr þar. Labbaði líka fram hjá kvikmyndatöku úti á götu í gær. Fáránlega mikið af fólki sem er í kringum svona batterí. Gisti á Hilton hóteli í miðbæ LA. Það er sundlaug á þakinu, en stundum er hún notuð í kvikmyndatökur og því lokuð. Nú er hún öllum opin. Gott mál.

Það fækkaði um 1 í Bláa liðinu í dag. Stelpan sem var með og seldi dót fór heim. Þarf að fara til annarra útlanda á morgun. Það verður skrítið að vera bara 3 í Bláa liðinu restina af ferðinni, en nú er ekki mikið eftir.
San Francisco á morgun, Portland á sunnudaginn , og keyrt til baka til Seattle þá um kvöldið/nóttina.

Í himnaríki?

2009-09-28T22:28:00.003+02:00

Búin að vera ansi stíf keyrsla síðustu daga, og ekki laust við að bláa liðið væri orðið þreytt á setunni í bílnum eftir 13 tíma akstur í gær. Frá Denver, Colorado til Phoenix, Arizona.
Í dag er frí.
Hljómsveitin skiptist í 2 lið. Bláa liðið og hvíta liðið. Í bláa liðinu erum við stelpurnar þrjár og einn strákur. Í hvíta liðinu eru bara strákar (2). Svo er keppni hver vinnur. Það að vinna getur þýtt ýmislegt.
Á þessu ferðalagi er yfirleytt gist í heimahúsum hjá vinum og ættingjum hljómsveitarmeðlima. Aðbúnaður hefur verið mjög góður, og oft hefur maður hugsað með sér að hlutirnir gætu hreinlega ekki verið betri. Nú held ég að toppnum sé náð. Bláa liðið dvelur nú rétt fyrir utan Phoenix heima hjá fólki sem á RISAhús með RISAgarði. Hvíta liðið dvvelur annars staðar hér í Phoenix. Flestir nágrannarnir eru með hesta í garðinum. Ekki þetta fólk. Það er hins vegar með sundlaug með rennibraut og hval. Í dag er 105 stiga hiti á farenheit, sem samkvæmt Sóleyju er alltof heitt. Það er hins vegar ekkert of heitt þegar maður getur dýft sér í sundlaugina við og við, og annars setið í forsælunni með bjór í hönd. Í þessum rituðum orðum sit ég einmitt við sundlaugarbakkann.
Þetta er ansi hreint ljúft.
Bláa liðið vann örugglega í dag!

Cleveland

2009-09-24T22:18:00.002+02:00

Þá er maður loksins kominn úr stórborginni. Verð að viðurkenna að mér finnst smærri staðir skemmtilegri en þeir stærri. Alltof mikið af fólki, umferðarteppur og óheyrilegar vegalengdir á milli staða innanbæjar. Íbúðin sem ég gisti í í Nýju Jórvík var samt frábær. Á 29. hæð (með þaksvölum á 35. hæð) steinsnar frá Empire State byggingunni. Og ekkert lítið flott íbúð. Sér baðherbergi með hvoru svefnherbergi, plús gestakló, risaflatskjár og gluggar sem náðu frá gólfi uppí loft. Með útsýni! Gallinn við að búa í svona flottri íbúð er að maður týmir varla að fara út. Aukadagurinn sem við fengum í stórborginni var því að mestu nýttur innandyra. Sem kom sér reyndar ágætlega. Þvoði af mér leppana og lék mér heillengi með rauða kubba.

Fórum svo ekki til Washington DC. Gigginu þar var aflýst. Komum til Cleveland í gær, og fengum að vita um klukkutíma fyrir áætlað gigg að því hafði líka verið aflýst. Bömmer, en samt ekki. Fundum annan stað til að spila á hér í bæ í gærkveldi, og náðum okkur í aukagigg fyrir kvöldið í kvöld. Þetta þýðir reyndar að við þurfum að keyra til Omaha í Nebraska í nótt. Ég er ekkert brjálæðislega hrifin af næturkeyrslum, en maður lifir þær svosum alveg af.
Cleveland er góður staður að vera á.

Á morgun er það semsagt Omaha.
Þar hitti ég Sóleyju og fjölskyldu.
Jeij.

Stóra eplið

2009-09-20T19:02:00.003+02:00

Komin til New York. Spiluðum í Brooklyn í gær. Seinna giggið á Manhattan í kvöld. Frídagur á morgun. Gisti á 29. hæð í íbúðablokk á Manhattan. Með þaksvölum. Er ansi upptekin við að horfa út um gluggann. Er ekki búin að sjá þetta stóra epli sem allir eru að tala um.

Risabaun

2009-09-17T19:10:00.002+02:00

Það er ýmislegt sem maður þarf að venjast þegar maður er á ferðinni og gistir aldrei tvær nætur á sama stað. En það venst allt ótrúlega hratt. Ákveðin kúnst að gleyma ekki neinu neinsstaðar. En það hefur hingað til tekist fullkomlega. Held ég hafi ekki skilið eftir mig svo mikið sem einn sokk enn sem komið er. Og svo er það þetta með símann. Eða símaleysið öllu heldur. Það vandist um leið. Er ekki búin að vera í símasambandi í tæplega 3 vikur, og er ekki að sjá að það skipti mig neinu máli. Fyndið. Svona hlutur sem maður hélt að maður gæti ekki lifað án.

Ágætis samkomulag er á meðal hljómsveitarmeðlima, og kannski einum of mikil samheldni stundum. Þegar við mættum hingað til Chicago vorum við t.d. öll í eins bolum (sem við höfðum fengið gefins deginum áður). Náunginn sem við gistum hjá hélt að við værum eitthvað skrítin. Kvöldið eftir (í gærkvöldi) vorum við flestöll í hvítum skyrtum. Þetta er sko jakkafatahljómsveit. Þar með var hann sannfærður um að við værum ekki alveg í lagi.

Vorum túristar í Chicago í gær. Það var gaman. Það sem stóð upp úr hér í borg var tvímælalaust risastór baun (eða nýra eða eitthvað) úr málmi.

Frídagur

2009-09-15T22:49:00.002+02:00

í dag. Það eina sem þarf að gera er að keyra til Chicago, en það tekur ekkert langan tíma. Ætlum að bíða fram yfir mesta umferðartímann og notum tímann á meðan til að tjilla, þvo föt og þannig.
Í Útlöndum er enn sumar. Búið að vera frábært veður allan tímann. Ágætis framlenging á sumrinu myndi ég segja.
Næstu dagar verða nett strembnir. Planið er svona:
Miðvikudagur: Chicago, Illinois
Fimmtudagur: Oshkosh, Wisconsin
Föstudagur: Pittsburgh, Pennsylvania
Laugardagur: Brooklyn, New York
Sunnudagur: Manhattan, New York
og svo er frí á mánudaginn í New York
Lengsta keyrsla þessa vikuna verður frá Oshkosh til Pittsburgh. Held það séu einhverjir 12 tímar, og við missum af einum tíma.
Ætla að fara út að horfa á íkorna.

Keyrikeyri

2009-09-14T22:55:00.003+02:00

Búin að vera ansi stíf keyrsla síðustu daga. Keyrðum frá Minnepolis til uppsveita Wisconsin á föstudaginn. Vorum þar í sumarbústað í nágrenni Green Bay eitt kvöld. Í fríi. Frábær staður að vera á.
Vöknuðum snemma á laugardaginn og keyrðum yfir norðurhluta Michigan yfir brú og niður til Detroit. Misstum við það af einum klukkutíma. Í Detroit hittum við skemmtilega hljómsveit frá Hollandi. Gott partý. En Detroit er augljóslega ekki besta borg í heimi.
Í gær keyrðum við yfir smá hluta af Indiana og Illinois (sáum Chicago) og aftur til Wisconsin. Madison í þetta skiptið. Fengum þá til baka klukkutímann sem við misstum daginn áður.
Þannig að síðustu þrjá dagana erum við næstum búin að keyra risastóran hring. Vera á rúntinum 9-10 tíma á dag.
Í dag keyrðum við bara 2 tíma. Það var stuttur tími. Nú er það Racine. Enn í Wisconsin. Næstu dagar verða afslappaðri, en ég er ekkert að verða leið á rúntinum. Held ég verði aldrei leið á að keyra leeengi.
Wisconsin er uppáhaldsfylkið mitt hingað til. Það voða fallegt hér og skemmtilegt fólk. Héldum út á lífið í Madison í gærkvöldi með nokkrum aðdáendum og nú sit ég með foreldrum eins hljómsveitarmeðlims með bjór í hönd. Tónleikar í kvöld.

Þessi ferð var ekki farin til að sofa...

Minneapolis

2009-09-11T00:54:00.003+02:00

Þá er það Minneapolis í kvöld.

Í gærkvöldi vorum við í Oakes, ponsulitlum bæ í Norður-Dakota. Það var magnað. Flestir bæjarbúar mættir í golfskálann, hvar við héldum uppi stuði fram eftir kvöldi, og svo hélt stuðið áfram fram eftir nóttu. Þetta var eiginlega hálfgert ættarmót, þar sem tveir hljómsveitarmeðlima eru ættaðir frá þessum litla bæ. Þarna búa bændur þannig að það var borðað kjöt, beint af kúnni, og grænmetið var tínt útí garði. Í Ammríku er mikið af öllu. Fólk býr í risahúsum og boraðar stóran mat. Samt hef ég ekki séð mikið af mjög feitu fólki... ennþá, en fólk virðist fitna eftir því sem austar dregur.

Keyrðum 5 tíma í dag og 9 tíma í gær þannig að við höfum lagt ansi langar vegalengdir að baki. Eigum eftir að keyra um 16.000 kílómetra samkvæmt nýjustu upplýsingum.
Það er gaman að keyra eftir löngum beinum vegi.

Mælieiningar í þessu landi eru lítt skiljanlegar. Mílur og pund get ég reiknað út, en farenheit-gráður eru mér illskiljanlegar. Í dag voru rúmlega 80 gráður á farenheit-kvarða utandyra. Það var bara ansi hlýtt og notalegt. Og svo eru únsur og gallon. Það skil ég ekki heldur. Ég veit að Gallon er meira en únsa, en það er líka allt og sumt sem ég veit um þessar mælieiningar. Þannig að ef einhver hefur brennandi áhuga á að upplýsa mig um gráður á farenheit, únsur og gallon, þá er viðkomandi vinsamlegast beðinn um að skrifa það í athugasemdakerfið hér að neðan.

Kominn tími til að undirbúa sig undir gigg kvöldsins á viðeigandi hátt.
Fá sér bjór.

Í Montana

2009-09-07T23:59:00.003+02:00

Þá er ferðalagið hafið fyrir alvöru. Það hófst á laugardaginn eftir afbragðs pönnukökuboð. Fannst reyndar pínu skrítið að bjóða upp á vodka með morgunmatnum, en hei, þetta eru Útlönd.
Spiluðum í Spokane á laugardagskvöldið og gistum hjá eiganda tónleikastaðarins, sem bauð uppá vöfflur með hnetusmjöri, sírópi og beikoni í morgunmat. Er farin að skilja af hverju Útlendingar eru feitir.
Í gær keyrðum við yfir smá bút af Idaho, töpuðum við það einum klukkutíma, og svo yfir hálft Montana-fylki. Það er stórt. Þessa dagana dveljum við á RISA sveitasetri rétt fyrir utan bæ sem heitir Bozeman.
Á morgun er förinni heitið til Billings, þar sem næstu tónleikar fara fram.

Á ferðalaginu eru nú 5 manneskjur og 2 bílar.
Á morgun bætist við 1 manneskja og enginn bíll.

Bílarnir eru:
-Hvíti sendiferðabíllinn sem geymir allt dótið og 2 manneskjur.
-Blái framsóknarbíllinn sem geymir næstum ekkert dót og 3 manneskjur, 4 frá og með morgundeginum. Bíllinn er kallaður framsóknarbíll af því að það stendur xB á honum.

Manneskjurnar eru:
-Bart, söngvari og gítarleikari og aðalkallinn í bandinu.
-Katie, söngkona
-Rich, orgel- og gítarleikari
-Kópur, trommu- og þríhornleikari
-Og ég, bassa- og túbuleikari.
Sú sem bætist við á morgun mun sjá um geisladiska- og bolasölu.

Útvarpið

2009-09-04T20:42:00.002+02:00

Á morgun spilum við í beinni á internet-útvarpsstöð. Hún er staðsett hér:
www.hollowearthradio.com
Við spilum klukkan 10 fyrir hádegi að staðartíma.
Það þýðir klukkan 17.00 að íslenskum tíma og 19.00 að norskum.

Ókei!

2009-09-04T02:56:00.002+02:00

Komin í tengsl við rafmagn með viðeigandi búnaði.
Fyrsta gigg hljómsveitarinnar var í gær. Það var ágætt, en full-spennandi fyrir minn smekk. Túban ákvað að fara í verkfall mjög fáum mínútum áður en hljómsveitin steig á svið, þannig að ég fékk það áhugaverða hlutverk að spila alveg þónokkur lög á bassa í fyrsta skipti á meðan á tónleikahaldi stóð.

Í dag var túban löguð af þar til gerðum viðgerðarmanni, og ástæða bilunar var fundin, þannig að sams konar bilun í framtíðinni hefur verið fyrirbyggð.

Annars er þetta frídagur. Ekkert verið að spila. Á morgun er það svo Tacoma og pönnuköku-útvarpspartý á laugardagsmorguninn. Þá munum við spila í beinni á einhverri alnets-útvarpsstöð. Eftir pönnukökupartýið verður lagt í ferðalagið sjálft. Þangað til er staðsetningin Seattle, meira eða minna.

Útlönd

2009-09-02T20:58:00.001+02:00

Komin til Seattle (í fyrradag).
Fyrsta gigg í kvöld (Seattle).
Meira síðar (þegar ég er búin að finna millistykki fyrir rafmagn. Rafmagn í Útlöndum er öðruvísi).

Ísland á morgun

2009-08-28T20:06:00.001+02:00

USA á mánudaginn

Tilvonandi ferðalög

2009-08-26T18:29:00.003+02:00

Það er voða gaman í skólanum. Einstaklega margir fundir skipulagðir þessa vikuna, sem flestir eru á morgun. Í mörg horn er að líta þessa dagana þannig að nú líður mér soldið einsog hausinn á mér sé að springa úr upplýsingum.

Brátt er þessum tveimur og hálfri viku á heimili mínu hér í Útlandinu lokið. Gott að vera heima, en frá og með laugardegi hef ég öðrum hnöppum að hneppa. Í 6 vikur eða svo.

Þessum hnöppum skal hneppt:

Eftir stutta viðkomu í heimalandinu skal haldið til Bandaríkja Norður-Ameríku í poppstjörnuleik. Þar mun verða dvalið í um 5 vikur og tónleikar spilaðir á eftirtöldum stöðum:

2. sept. Seattle, Washington
4. sept. Tacoma, Washington
5. sept. Spokane, Washington
7. sept. Moscow, Idaho
8. sept. Billings, Montana
9. sept. Oakes, North Dakota
10. sept. Minneapolis, Minnesota
12. sept. Hamtramck, Michigan
13. sept. Madison, Wisconsin
14. sept. Racine, Wisconsin
16. sept. Chicago, Illinois
17. sept. Oshkosh, Wisconsin
18. sept. Pittsburgh, Pennsylvania
19. sept. Brooklyn, New York
20. sept. New York
22. sept. Washington DC
25. sept. Omaha, Nebraska
26. sept. Arvada, Colorado
29. sept. San Diego, California
30. sept. Los Angeles, California
1. okt. Highland Park, California
3. okt. Eugene, Oregon
4. okt. Portland, Oregon

Á öllum þessum tónleikum mun ég koma fram sem bassa- og túbuleikari með hljómsveitinn The Foghorns. Ef þið eruð í nágrenni við þessa staði á þessum tímum, endilega kíkið á tónleika. Allar nánari upplýsingar um hljómsveitina og alla þessa tónleika má finna á mæspeis-síðu hljómsveitarinnar. Eins sýnist mér að enn sé verið að bæta við tónleikum, þannig að fylgist með ef þið eruð stödd í USA.

Skólinn byrjaði í dag

2009-08-24T18:39:00.002+02:00

Jibbíjeij!

Alltaf gaman að byrja í skólanum. Hann byrjar æfinlega með hátíðlegri athöfn þar sem margir flinkir spila á hljóðfærin sín og nokkrir kallar halda ræður, oft skemmtilegar. Í dag fengu líka nokkur fólk afhent rauð prik og blóm í tilefni nýfengra doktorgráða. Og svo sungu allir viðstaddir saman eitt lag við fagran orgelundirleik. Magnað þegar 400 manns, sem allir geta sungið, syngja saman. Af krafti...

Sýndist annars ekkert margt vera að gerast þessa vikuna, en það breyttist. Í marga fundi með öllum mögulegum og ómögulegum, og tímum með öllum einkakennurunum mínum (þremur). Eins gott þar sem ég verð bara í skólanum þessa eina viku. Eftir hana tekur við 6 vikna hlé þar sem öðrum verkefnum verður sinnt.

Dagurinn sem hvarf

2009-08-15T21:19:00.001+02:00

var í dag.

Hvert fórstu dagur?

Núna, sko, núna

2009-08-14T15:11:00.003+02:00

er kominn tími til að gera eitthvað að viti.
En ætli það fái ekki að bíða til morguns. Í dag er of gott veður og á morgun er spáð rigningu.

Sumarið var afkastamikið.
Helsta afrekið var sundferðir, ekki ein heldur þrjár! Þar af tvær í sömu viku. Hef ekki farið í sund í mörg ár og telst þetta því til ótrúlegs afreks.
Sundlaugar prófaðar:
- Á Sauðárkróki
- Í Þjórsárdal
- Á Suðureyri við Súgandafjörð

Ferðalög sumarsins voru mörg.
Staðir heimsóttir (ekki í þessari röð):
- Vestfirðirnir, tvisvar
- Egilsstaðir city, tvisvar
- Vestmannaeyjar
- Sólheimar á Grímsnesi
- Flatey á Breiðafirði
- Stykkishólmur, o.fl. á Snæfellsnesinu
- Siglufjörður, o.fl. á Norðurlandinu
- Hálendið (Sprengisandur er grá leið)
- Höfuðborgarsvæðið, oft
og örugglega eitthvað fleira sem ég er að gleyma.

Nú er ég tekin til við að tuða í skólanum, þó það hafi alls ekki verið ætlunin.
Í samtali við Hæstráðanda kom í ljós að ég fæ allt sem ég vil (jess), en svo þurfti ég endilega að reka augun í að eitthvað valfag er ekki alveg eins og það á að vera (bömmer), og þurfti auðvitað endilega að skipta mér af því.
Og ég sem ætlaði að einbeita mér að því að tuða ekki neitt.
En jæjajæja.
Svonerettabara.
Sumir VERÐA að tuða yfir einhverju.

Aftur í Norge

2009-08-12T21:35:00.004+02:00

Komin aftur til Noregs eftir sumardvöl á Íslandi og vikustoppi í Svíþjóð.
Búið að vera fáránlega gaman í allt sumar.
Það tekur á að hafa gaman.
Svaf í 14 tíma í nótt og reikna með að fara snemma að sofa í kvöld.
Við taka fáeinar vikur af praktískum hlutum áður en næsta ferðalag hefst.
Meira um það síðar.

Farin

2009-08-03T21:54:00.002+02:00

aftur til Útlanda.

Takk fyrir sumarið!

Meira blogg eftir svona viku.

Þá er það

2009-05-15T09:40:00.001+02:00

Ísland.

Sjáumst þar í sumar.

Annar

2009-05-14T10:58:00.000+02:00

í júróvisjon.

Og mikið óskaplega held ég nú með Noregi.

Fyrsti

2009-05-12T16:21:00.001+02:00

í júróvisjon er í dag.

Mikið ofboðslega held ég að framlag okkar Íslendinga falli glæsilega úr keppni í kvöld.

Spái okkur í botn 5.

Síðasta vika

2009-05-11T19:44:00.002+02:00

þessa skólaárs er upprunnin.
Ekkert margt sem á eftir að gera, en þó smá:
-Eitt lítið próf í hljómsveitarstjórnun
-Tónleikar hjá lúðró
-Síðustu tímar í öllum fögum

og svo er það bara að pakka og drífa sig heim til Íslands á föstudaginn.

Mánudagsmorgnar

2009-05-07T10:47:00.004+02:00

halda áfram að slá í gegn.

Síðastliðinn mánudagsmorgun áttum við að læra um hörpu í skólanum. Þegar þangað var komið fengum við verkefni dagsins: Að skrifa lag fyrir hörpu. Ekkert athugavert við það. Afar viðeigandi verkefni. En lagið átti að semja STRAX! og skila á hádegi þennan sama mánudag.

Já, sæææll.

Við lagasmíðina fengum við að nota eftirfarandi hjálpartæki:
- Nokkrar bækur um hörpuleik.
- Hörpukonu. Sem vildi samt frekar að við notuðum bækurnar til upplýsingaöflunar, en hún var öll af vilja gerð að koma með hljóðdæmi, spiluð á staðnum.
- Hörpu. Sem við máttum fikta í að vild. Ég notfærði mér það góða boð nú reyndar ekki, þar sem ég er einhverra hluta vegna alltaf hrædd um að svoleiðis tæki detti í gólfið og brotni í þúsund mola ef maður svo mikið sem andi á þau. Það væri ekki gaman.

Hörpukonan lenti í því fyrir nokkru að hörpunni hennar var stolið. Hver stelur eiginlega hörpu? Og hvernig fór vikomandi að því? Það er ekki eins og þetta sé hljóðfæri sem maður getur borið með góðu móti. Álíka meðfærilegt og píanó myndi ég segja. (Og álíka dýrt og flygill).

En allavega, verkefni mánudagsmorgunsins gekk vel og reyndist hin besta skemmtan.
Næsta mánudagsmorgun fáum við svo að heyra afraksturinn. Þá verður hörpukonan búin að æfa öll lögin, og mun leika þau af sinni alkunnu snilld.

Það verður nú gaman

Skrímsl

2009-05-03T19:47:00.003+02:00

Lenti í bráðri lífshættu í morgun. Það er alltaf óþægilegt svo árla sunnudags.
RISA fluga sem líktist geitungi tróð sér inn um gluggann minn. Mér tókst með snarræði að koma henni út aftur. Þurfti þó til þess að opna gluggann töluvert meira. Skil ekki alveg hvernig henni tókst að koma sér inn um rifuna.
Þetta er eitt af örfáum ókostum við að búa í Útlöndum - skrímsli dulbúin sem flugur eða önnur skordýr.

En við þetta þarf ég ekki að búa lengi að þessu sinni. Held til sumardvalar á landinu ísa (þar sem risa skordýraskrímsli búa ekki) eftir tæpar tvær vikur. Helstu viðkomustaðir fyrstu dagana á landinu verða Sólheimar, Höfuðborgin og Vestmannaeyjar.

Húrra fyrir Eyjum!

Í dag

2009-05-01T11:20:00.000+02:00

er 1. maí.

Til hamingju með daginn verkalýður.

Að lita eða ekki lita...

2009-04-27T18:35:00.002+02:00

Hvað er málið með mánudaga?

Síðasta mánudag vaknaði ég eeeldsnemma og keyrði langtlangtlangtlangtlangt uppí sveit, eins og fram hefur komið á þessari síðu.

Þennan mánudaginn vaknaði ég á venjulegum mánudagstíma og mætti í skólann klukkan níu. Fékk að vita þegar þangað var komið að kennari dagsins væri veikur. Það gerist næstum aldrei. Ákvað að vera rosa dugleg og æfði mig bæði á lúður og í priksveiflum.
Þegar því var lokið var bara komið hádegi.
Og ég var löt.
Það eina sem mig langaði til að gera var að lita. En það tilheyrir víst ekki eðlilegum hluta af vinnudegi fullorðinnar manneskju.

En mig langaði samt að lita.

Þannig að ég litaði mynd af flautukonsert. Konsert þessi inniheldur nú 8 fiska, 1 snák, laufblað, gorm og ýmislegt fleira. Og fullt af litum.

Þegar maður er fullorðinn getur maður ráðið sjálfur hvað maður gerir.

Liggaliggalái.

Letihaugur og innipúki

2009-04-26T19:45:00.002+02:00

og nenni því ekki að blogga neitt mikið meira en eina setningu þessa dagana, né heldur taka þátt í því skemmtanalífi sem í boði er.

Skrópaði í afmæli sem stóð yfir í 3 daga.
Nennti ekki að hitta bjórfélaga í gær. Fór frekara að sofa eftir að hafa beðið eftir fyrstu tölum úr kosningunum. Sem passaði reyndar mjög vel. Þá vaknaði ég nefnilega í þann mund sem síðustu tölur voru gerðar opinberar.
Er þó búin að mæta á 3 tónleika síðustu 4 daga.
Ókei, ekkert svo mikill innpúki kannski, en allavega letihaugur.

Allir búnir að kjósa og reikna ég með að allflestir séu ánægðir með úrslitin.

Til hamingju með það

Allir að kjósa

2009-04-25T10:59:00.000+02:00

einn, tveir og þrír...

Jeij

2009-04-23T11:04:00.001+02:00

Sumar

Jeij

Nei

2009-04-20T18:43:00.004+02:00

Það er ekkert sniðugt að vakna eldsnemma. Maður er kannski þokkalega hress í svona 2-3 tíma, en svo er maður drulluþreyttur það sem eftir lifir dags.
Mæli því engan vegin með að vakna eldsnemma, nema maður þurfi þess nauðsynlega.
Í dag þurfti þess nauðsynlega, og það var ýmislegt sem kom á óvart.

Ég hélt að við værum að leggja af stað svona eldsnemma til að losna við mestu morgun umferðina, en værum í rauninni ekki að fara svo langt. Það var misskilningur. Það tók jú smátíma að komast útúr bænum, en eftir að útúr bænum var komið keyrðum við lengilengilengilengilengi. Næstum því til Svíþjóðar. Æfingin var ekkert útí sveit. Hún var í þrjátíuþúsund manna bæ rétt við landamærin.
Það var líka eitthvað skrítið við að það væri einhver atvinnulúðrasveit með æfingu uppí sveit.

Lúðrasveitin átti að spila útsetningarverkefni nemenda í vissum kúrsi. Í þessum kúrsi eru 10 manns, þar af skiluðu 4 verkefni, þar af voru 3 á staðnum. Hversu miklir sluksar geta þessir blessuðu tónsmíðanemar verið? Og hversu erfitt getur verið að klambra saman einhverju örstuttu fyrir lúðrasveit?
Tónsmíðanemar eru ekki fólk til að stóla á. Það hef ég lært í þessu námi. Meira eða minna bjánar sem datt ekkert skárra í hug að gera. Ekki séns að þetta lið geti skilað af sér verkefnum á réttum tíma, og hvað þá mætt í skóla/vinnu á réttum tíma.
Mæli ekki með að ráða svoleiðis fólk í vinnu.

Og hananú.

En allavega. Ef maður vaknar eldsnemma er maður orðinn drulluþreyttur upp úr hádegi. Þá áttum við eftir að keyra lengilengilengilengilengi aftur til baka. Og svo þurfti ég auðvitað að leggja mig. Það gerist sjaldan neitt af viti eftir eftirmiðdagslúr.
Það er því fullkomlega tilgangslaust að vakna eldsnemma nema maður þurfi þess nauðsynlega. Miklu gáfulegra að sofa aðeins lengur og takast á við verkefni dagsins úthvíldur.

Þetta var sagan af því að vakna eldsnemma.

Síðasti í páskafríi

2009-04-19T19:58:00.002+02:00

er í dag. Og, já, þetta var langt páskafrí að venju.

Notaði síðasta "fríkvöldið" til að kíkja út á lífið með saxófóngenginu. Það var gaman að venju.

Á morgun byrjar síðasta törn þessa skólaárs með trukki. Þarf að vakna fyrir allar aldir og fara uppí sveit til að hlusta á litla atvinnu-blásarasveit spila útsetningarverkefni. Það verður örugglega fróðlegt og skemmtilegt.
En það kostar líka það að vakna klukkan hálfsjö.
Þá er nótt.

Hugleiðingar um kosningar

2009-04-18T09:44:00.003+02:00

Þá er ég búin að kjósa.
Hef þó vissar efasemdir um að atkvæðið komist nokkurntíma til skila. Hér kemur ástæðan fyrir þeim efasemdum:

Í hvaða kjördæmi kjósa Íslendingar með lögheimili erlendis?
Agnesi og dömunni sem vinnur hjá íslenska sendiráðinu hér í bæ voru sammála um að þeir kysu í því kjördæmi sem lögheimili var síðast skráð á Íslandi.

En reynslan sýnir annað. Í sambærilegum kosningum 2007 kaus ég einnig utankjörfundar, og mínar búsetuaðstæður voru að öllu leyti þær sömu. Þá kaus ég hjá Sýslumanninum í Reykjavík mörgum vikum fyrir kjördag. Þá var mér tjáð að allir Íslendingar búsettir erlendis kysu í öðru hvoru Reykjavíkurkjördæminu. Óháð því hvort viðkomandi hefði nokkurntíma búið í Reykjavík. Upphafsstafir kennitölu skáru úr um í hvoru Reykjavíkurkjördæminu fólk lenti.

Eru reglur um þetta mál bara einhvernvegin frá ári til árs? Og ef svo er hver ræður þeim þá? Miðað við hvað aðrar reglur og lög um kosningar eru niðurnjörvaðar og ófrávíkjanlegar, þykir mér þetta með ólíkindum.

Ég vafraði aðeins um alnetið í leit að upplýsingum. Þar fann ég þetta á síðunni kosning.is:

Hvar lenda íslenskir ríkisborgarar búsettir erlendis sem teknir eru inn á kjörskrá ef þeir voru áður með lögheimili í Reykjavík?
Landskjörstjórn ákveður mörk norður- og suðurkjördæmis í síðasta lagi 4. apríl. Miðast sú skipting við að fjöldi kjósenda að baki hverju þingsæti sé nokkurn veginn jafnmikill og að kjördæmin séu sem samfelldust heild. Þegar íslenskir ríkisborgarar búsettir erlendis eiga í hlut verður miðað við að þeir sem fæddir eru í fyrri hluta hvers mánaðar verði í suðurkjördæmi og að þeir verði í norðurkjördæmi sem fæddir eru í síðari hluta hvers mánaðar.

Hvergi var minnst á fólk sem ekki hafði átt lögheimili í Reykjavík áður en flust var af landi brott. Kannski hefur mönnum þótt það liggja í augum uppi að þeir einstaklingar kysu í því kjördæmi sem þeir bjuggu í síðast. En það lá þá greinilega ekki ljóst fyrir í kosningunum 2007.

Og eitt enn:
Er sama í hve langan tíma síðasta lögheimilið var skráð, eða er miðað við lögheimili 1. des fyrir brottflutning?

Mitt atkvæði er á leið til Sýslumannsins á Seyðisfirði, í hvers kjördæmi ég átti lögheimili í eina viku áður en flust var af landi brott.

Það væri áhugavert að vita hvort það atkvæði verður tekið gott og gilt þar, sent eitthvað annað eða hreinlega hent í ruslið.

Komin heim og kosningar

2009-04-15T19:01:00.003+02:00

Komin til heima-Útlandsins eftir páskaferðina til annarra Útlanda.

Ferðin var hin mesta skemmtun, þó í lengsta lagi væri. Held að 5-7 dagar sé alveg nóg af ferðalagi fyrir mig.
Komst að því að það er hægt að fá leið á bæði bjór og ostum, sem og ítölskum mat sem inniheldur alla jafna óhóflega mikið hveiti. Langar mest að borða eingöngu grænmeti og drekka ekkert sterkara en vatn um ófyrirsjáanlega framtíð... eða allavega í nokkra daga.

Helsta afrek ferðarinnar var að koma páskaeggi óbrotnu alla leið að heiman til Mílanó með nokkurra daga viðkomu í Berlín og Prag (og Osló auðvitað). Geri aðrir betur. Páskaeggið var svo etið upp til agna á ítalskri grund. Eins gott. Hefði verið frekar bjánalegt að þurfa að taka það með aftur til baka. Ég borðaði reyndar minnst af því sjálf, enda lítið gefin fyrir nammi, en hinir útlensku ferðafélagar nutu góðs af því.

Þá er næsta ferðalag eftir sléttan mánuð. Heim til Íslands, hvar sumrinu verður varið að venju.

Að öðru.

Senn líður að kosningum. Að því tilefni koma hér 2 mikilvægar spurningar:
- Hvar má finna framboðslista hinna ýmsustu flokk?
- Í hvaða kjördæmi kýs maður sem á lögheimili í Útlöndum - eða hvar má nálgast þær upplýsingar?

Vil helst vita hvaða fólk ég er að kjósa. Finnst alls ekki nóg að kjósa flokk sem hefur hin og þessi mál á stefnuskránni.
Fólk skiptir máli.

Komin og farin

2009-04-01T21:19:00.002+02:00

Frábær helgi í Þrándheimi liðin. Magnað hvað er gaman á hinu árlega lúðramóti í þeim fallega bæ. Jafnast alveg á við Þjóðhátíð í Eyjum - bara styttra. Mikil stemming og margir sem maður þekkir. Og einstaklega vel skipulagt allt saman. Enda ekki fyrir hvern sem er að taka á móti yfir fjögurþúsund lúðraspilurum á einu bretti.

Nú er ég að baksast við að klára eitt verkefni. Það er að taka langan tíma, en nú sýnist mér ég vera nokkurnvegin búin (áðí). Þarf að skila 14. apríl, og það er einmitt dagurinn sem ég kem heim frá Útlöndum = varð að klára þetta áður en lagt er íann.

Á morgun held ég í páskaferð um Evrópu. Ferðin sú tekur 12 daga.
Verð að pakka einhverju niður í tösku.
Ef einhver þarf nauðsynlega að ná í mig þessa 12 daga, verð ég með íslenska símanúmerið.

Gleðilega páska

Er fólk fíbbl?

2009-03-23T18:46:00.003+01:00

Í dag fór ég í búð og verslaði áfengi. Þegar kom að því að greiða fyrir vöruna var ég beðin um skilríki, sem er ekki í frásögur færandi þar sem það gerist oftar en ekki. Í þetta skipti var heldri maður fyrir aftan mig í röðinni. Honum þótti þetta athæfi greinilega grunsamlegt og fram fór eftirfarandi samtal:

Heldri maður: Hvað þarf maður að vera gamall til að versla áfengi?
Afgreiðslumaður: Átján ára... en hún lítur bara svona út, hún er sko alveg um þrítugt.
Heldri maður: Nú? Ég hélt hún væri svona fjórtán.

... og hversu oft hefur fólk ekki sagt við mann að þegar maður verði kominn á vissan aldur líti maður á það sem hrós að fólk telji mann yngri en maður er í raun og veru.

Oft hefur maður heyrt að það eiga að bera virðingu fyrir sér eldri og vitrari. Takið eftir og-inu þarna á milli. Eldri OG vitrari. Hér er vísað til að maður verði vitrari með aldrinum, sem er vissulega rétt. Með aukinni lífsreynslu öðlast maður meiri visku. Skólaganga hvers og eins hefur lítið með það að gera hversu mikinn vísdóm maður hefur viðað að sér. Aldur hefur hins vegar mikið að segja í því tilliti. Með tímanum lærir maður meira og meira um það sem skiptir máli í lífinu.

Fólk - og þá sérstaklega kvenfólk - er margt hvert mjög upptekið af að halda unglegu útliti. Ég get ekki skilið af hverju. Ég hlakka til þegar ég lít út fyrir að vera gömul. Fólk talar nefnilega við (h)eldra fólk af meiri virðingu en ungling, sem eðlilegt er. Eldra fólk er vitrara og unglingar eru oft til vandræða, því þeir vita minna.

Þá spyr maður sig:
Vil fólk virkilega líta út fyrir að vera heimskara en það er?
Og af hverju?
Á maður að taka því sem hrósi ef fólk heldur að maður sé yngri (=heimskari) en maður er?

Fyrir ykkur sem viljið enn halda í unglegt útlit, þá er hér aðferðin sem ég notaði:
- Drekka óhóflega mikið áfengi eins oft og auðið er.
- Stunda ekki líkamsrækt að neinu tagi.
- Borða það sem mann langar í í það og það skiptið.
- Huga lítið sem ekkert að eigin útliti.

Hef oft velt því fyrir mér hvernig maður fari að því að líta út fyrir að vera eldri. Reyndi að byrja að reykja. Það gekk ekki neitt. Þannig að núna reyni ég að brosa mikið. Þá hlýt ég að fá hrukkur eftir smá tíma.

Nútíð og framtíð

2009-03-20T18:14:00.003+01:00

Mikið að gera?
Jájájá.

Tónleikar í gær með David Byrne. Hann ku vera frægur. Mjög flottir tónleikar hjá kallinum. Búningar og sviðshreyfingar á hreinu. Með dansara og allt. Kúl.

Framtíðin:
Skóli
Lúðrasveit
Meiri skóli
Meiri lúðrasveit
Þrándheimur
Enn meiri skóli
Útlönd
Páskafrí
Aðeins meiri skóli
Og lúðrasveit
Koma til Íslands 15. maí.
Vantar sennilega húsaskjól þarlendis í einhverja daga. Annars eru staðsetningar á heimalandinu frekar óljósar enn sem komið er.

Kvikmyndir vikunnar

2009-03-11T12:40:00.002+01:00

Hef verið óvenju dugleg að sækja kvikmyndahús bæjarins heim upp á síðkastið. Er reyndar að verða svo ótrúlega snobbuð að ég fer helst ekki í bíó nema um "sérstakar" sýningar sé að ræða, og borga helst ekki aðgangseyri.

Fór á "leynifrumsýningu" í Noregi á einni ammrískrí mynd (Gran Torino) á sunnudaginn, og í gær sat ég "fyrirmennafrumsýningu" á myndinni Karlar sem hata konur, sem gerð er eftir samnefndri bók Stieg Larsson. Væntingar til þessarar myndar voru gríðarlegar. Allir virðast hafa lesið bókina, og fyrirfram taldi fólk að myndin væri jafnvel betri en bókin. Nú hef ég reyndar ekki lesið bókina, en þori þrátt fyrir það nánast að fullyrða að bókin er betri. Myndin er ágætis afþreying, en ekkert meira en það. Leikarar standa sig reyndar afbragðsvel (sem er næstum ótrúlegt miðað við að leikararnir eru sænskir og leikstjórinn er danskur - og enginn skilur dönsku), en það eru takmörk fyrir því hversu vel er hægt að gera mörgum persónum skil í mynd sem er aðeins 2,5 klukkutími að lengd. Á þessari fyrirmennasýningu var fólk reyndar látið lofa að mæla með þessari mynd útávið, eða halda kjafti ella.
Sumir eru bara ekkert góðir í að halda kjafti.

Niðurstaða þessarra tveggja bíóferða:
Gran Torino er betri. Mæli með henni.

Annars er lífið bara ljúft.
Enginn skóli fyrr en á mánudaginn og sól úti í dag.
Ljúft.

Dös og breytt plön

2009-03-06T14:57:00.003+01:00

Þessi vika hefur skipst jafnt milli þreytu og dasa. Hef verið dugleg að drekka bjór. Annan hvern dag. Verið þreytt daginn eftir og farið ósiðsamlega snemma að sofa, og því verið dösuð daginn þar eftir sökum of mikils svefns. Í dag er dasaður dagur.

Í næstu viku er inntökuprófavika í skólanum. Þá vikuna er ekki mælt með að núverandi nemendur skólans séu mikið að flækjast þar, þar sem tilvonandi nemendur þurfa að hafa óheftan aðgang að salarkynnum og kennurum skólans. Hef því hugsað mér að nota næstu vikuna í að tónsmíða fullt og gera önnur skólatengd verkefni. Þar er á ýmsu að taka. Spurning um að gera Plan.

Annars hafði ég líka hugsað mér að nýta páskafríið í heimavinnu. Gerði það í fyrra. Var heima í Útlandinu, var þvílíkt dugleg og hafði það huggulegt þess á milli. Afbragð.
Það plan hefur hins vegar breyst. Núverandi páskaplan hljóðar uppá tæplega tveggja vikna ferð um Evrópu.
Áfangastaðir: Berlín, Prag og Mílanó
Markmið: Smakka bjór á skipulegan hátt.
Verður eflaust gaman.

Komandi helgi fer í lúðra-æfingar, sem og aðrar helgar í þessum mánuði. Síðustu helgi mánaðarins er nefnilega Keppnin í Þrándheimi.

Í lífshættu

2009-03-02T15:13:00.003+01:00

Hér Útlendis hefur snjóað linnulítið síðasta mánuðinn eða svo. Það ku fremur óvenjulegt hér innanbæjar, og hafa samgöngur því gengið upp og ofan síðan snjóhörkur hófust.

Snjókoman sem slík hefur ekki plagað mig mikið þar sem ég fer flestra minna ferða fótgangandi. En það getur hins vegar verið lífshættulegt í þessu árferði. Ástæðan eru snjóflóð af húsþökum og árásir risagrýlukerta frá þakskeggjum. Ef maður fær eitt svoleiðis í hausinn, sem dottið hefur úr ca. 10 metra hæð (en það er meðalhæð húsa á leið minni í skólann), þá deyr maður. Örugglega.

Og enn snjóar. Samt er kominn mars. Bind engu að síður vonir við að vorið mæti á svæðið 1. apríl, að venju. Mikið hlakka ég til.

Menning

2009-02-28T15:56:00.002+01:00

Búin að mæta á 5 tónleika í vikunni. Þar af 4 á hinni árlegu Vetrar(ó)hljóðahátíð. Hið merkilega gerðist að af þessum 4 tónleikum, voru 50% alveg hreint ágætir.

Þeir fyrstu (á mánudaginn) áttu tvímælalaust vinninginn í skemmtilegheitum. Þar voru mættir nokkrir hressir Útlendingar sem spiluðu á nýuppfundin hljóðfæri. Þar mátti m.a. sjá fótstigið skrifborð með einum streng sem hljómaði eins og rafmagnsgítar, samblöndu af sellói og didjerídú-i í einu hljóðfæri. Og margt fleira. Daginn eftir var svo gefinn kostur á að mæta og prófa hljóðfærin. Ég fattaði það ekki fyrr en of seint og er enn miður mín.

Á þriðjudaginn voru tónsmíðanematónleikarnir. Þetta er í fyrsta sinn sem við fáum að koma nálægt þessari hátíð, en eftir að hafa tuðað í 1,5 ár fengum við loks að vera með. Mjög fínir maraþontónleikar. Voru reyndar fáránlega langir, en áheyrendum var gefin kostur á að yfirgefa svæðið svo lítið bæri á, í tveimur hléum sem gerð voru á tónleikahaldi. Merkilega margir sem sátu alla tónleikana.

Mætti ekki á miðvikudagstónleikana. Var of þreytt eftir "bar-óhapp" kvöldið áður.

Kennarinn minn, Daninn og einn mastersnemi áttu verk á fimmtudagstónleikunum. Þeir notuðust við ýmsa nútímatækni (vídjó, tölvukvartett o.fl.) og var útkoman leiðindi með bjánahroll. Það sem reddaði þessu var takmörkuð lengd tónleikanna (innan við klukkutími) og bjánahrollurinn sló á leiðindin að einhverju leyti.

Síðustu tónleikarnir (í gær) voru þeir al-leiðinlegustu. Fjögur verk, hvert öðru leiðinlegra. Langaði mest að leggjast í gólfið og grenja úr einskærum leiðindum. Samt voru þetta hóflega langir tónleikar. 1,5 klukkutími með hléi. Hléið var hápunktur tónleikanna. Verst að tveir samnemenda minna áttu verk á leiðindatónleikunum. Ég flýtti mér heim eftir þá til að sleppa við að tala við fólk.

Mætti líka á harðangursfiðlutónleika í gær. Harðangursfiðla klikkar aldrei.

Og í kvöld er það ofur-menningarleg bíóferð á mynd á ofur-menningarlegri kvikmyndahátíð.
Vona bara að hún sé ekki mjög leiðinleg. Held ég hafi klárað leiðindakvóta vikunnar, og rúmlega það, á tónleikunum í gær.

Tíminn líður

2009-02-25T18:32:00.002+01:00

Það fer víst ekkert á milli mála.

Magnað stuð á Íslandinu að venju. Fékk reyndar magaveiki og gat lítið sem ekkert borðað í 5 daga og bara drukkið vatn, en það kom ekki að sök. Gat alveg unnið vinnuna mína og talað við skemmtilegt fólk fyrir því.
Matur er greinilega ofmetið fyrirbæri.

Kom til Útlandsins á mánudaginn, og í gær vorum við tónsmíðanemarnir með stórkostlega vel heppnaða maraþontónleika. Mitt verk var síðast og þá voru merkilega fáir búnir að gefast upp og yfirgefa tónleikasvæðið.

Saxófónballettinn minn vakti mikla lukku. Verður tvímælalaust endurtekinn við tækifæri.

Ísland

2009-02-11T15:33:00.003+01:00

á morgun og verð til 23. þessa mánaðar.

Er ekki að nenna að pakka neinu niðrí tösku. Spurning um að stinga tannburstanum í vasann og láta það gott heita í niðurpakkningu...

Verð í höfuðborginni (á virku dögunum) og nágrenni (um helgar).

Vinsamlegast hafið samband ef áhugi er fyrir hendi.

Ókeibæ.

Neeeei!!!

2009-02-06T14:09:00.003+01:00

Ekki Kaupfélagið!

Einhvurra hluta vegna hef ég gjarnan staðið á þeirri meiningu að Kaupfélagið yrði það síðasta í öllum heiminum til að fara á hausinn. Það var greinilega röng meining. Eða er heimsendir kannski í nánd?
Fyrst Kaupfélagið getur farið á hausinn, þá hlýtur allt að geta gerst.
Og þá meina ég ALLT.

Fjárhagsleg staða undirritaðrar er hins vegar með besta móti. En ég á ekki alveg nóg til að redda Kaupfélaginu. Því miður.

Er annars búin að vera eitthvað slöpp undanfarna viku. Held ég. Ekkert mjög veik, en eitthvað skrítin.

Hér eru nokkrar hugmyndir um hvað gæti verið að:
-Smávægileg veiki af ókunnum uppruna
-Síþreyta
-Þynnka (frekar ólíklegt þar sem takmarkað magn af áfengi hefur farið inn fyrir mínar varir síðustu vikuna).
-Heilarýrnun, sökum neyslu á meintri megrunarvöru (varð allt í einu rosa hrifin af morgunkorninu Sérstöku Ká-i. Enginn veit hví)
-Lækkun líkamshita í kjölfar ómanneskulega mikils frosts utandyra

... eða kannski er ég bara eitthvað rugluð inní hausnum mínum.

Jæja

2009-01-31T15:56:00.002+01:00

Eitthvað lítið hefur maður nú nennt að skrifa hér uppá síðkastið. Ég kenni nýjasta fjölskyldumeðlimnum alfarið um það. Herra Sjónvarpi er mjög góður í að stela tíma.

Í fréttum er annars þetta helst:

Hinn pólski Penderecki kom í heimsókn í skólann og stjórnaði eigin verkum. Einnig voru haldnir kammertónleikar honum til heiðurs. Ágætt allt saman. Var svosum ekkert að deyja úr hrifningu, en ágætt. Jú, vissulega tónsmíðaði hann tímamótaverk, á sínum tíma. En það var þá... þau tímamót eru löngu liðin, og mikið vatn runnið til sjávar síðan þá. Mörgþúsundmilljónskrilljón lítrar.
Herra P. er nú samt afar merkilegur maður. Hann hefur t.d. afrekað það að verða heimsfrægt tónskáld í lifanda lífi. Ekki mörgum sem tekst það.

Síðan fyrir bankahrun hef ég unnið að því að skapa mér fjárhagslegt öryggi erlendis, hvar íslenskar krónur, eða fjármagn frá Íslandi, koma hvergi nærri. Það markmið er nú í sjónmáli. Frá komandi viku verð ég sennilega búin að koma mér upp tvöföldu hagkerfi, og mun um leið hætta að þurfa að flytja fjármuni milli landa. Loksins.
Þar með get ég hætt að lifa tvöföldu lífi og farið að lifa tveimur lífum, algerlega óháðum hvort öðru. Magnað.

Búin að vera feikidugleg í skólanum. Verð með síðustu æfingu á saxófónballettinum mínum á morgun, og túbulagið er komið vel á veg. Einhverjum smáverkefnum hefur þó verið frestað í óhófi, en markmiðið er að klára allt svoleiðis fyrir næstu Íslandsför, sem áætluð er eftir tæpar tvær vikur.

Hef sloppið algerlega við veikindi þennan veturinn. Var ekki einu sinni veik í jólafríinu, sem hefur verið fastur liður síðasta áratuginn eða svo. En nú finnst mér eins og veiki sé að krefjast inngöngu í líkama minn. Mun beita öllum brögðum til að það gerist ekki. Hyggst því eyða kveldinu í að fylgjast með undanúrslitum í júróvisjon. Norsku útgáfunni. Hef ekkert fylgst með þeirri íslensku, en ef marka má bloggskrif fólks er ég ekkert að missa af miklu.

Stjórnmál:
Ný ríkisstjórn = Gott mál
Jóhanna Sigurðar sem forsætisráðherra = Gott mál
Hvort hin nýja ríkisstjórn verði tilbúin til yfirtöku fyrir eða eftir helgi finnst mér ekki skipta nokkru máli.
Nenni að öðru leyti ekki að tjá mig um íslensk stjórnmál.
Alveg nógu margir sem sjá um það.

Takk og bæ í bili.

Allt að gerast

2009-01-27T16:33:00.000+01:00

í íslenskum stjórnmálum.

Ekki missa af því.

Eitt enn

2009-01-20T21:42:00.003+01:00

Gleymdi einu í upptaliningunni í gær:

-Snjór.

Og alveg slatti af honum.
Snjór er ávallt til trafala í stórborgum. Samgöngur fara úr skorðum og enginn kemst neitt á réttum tíma. Svo breytist snjórinn í slabb, drullu, drullupolla og drullutjarnir við víðförlar götur. Það er líka dáldið hált þannig að gamalt fólk og annað fólk sem er ekki vant slíku (sem eru næstum allir) dettur á hausinn.
Fúlt.

Annars átti ég víst afmæli í dag. Fékk gjafir á lúðrasveitaæfingunni. Í Útlöndum á maður afmæli miklu oftar.

Þess vegna passar örugglega prýðilega að halda upp á fertugsafmælið sitt síðar á árinu. Miðað við fjölda afmælisdaga síðustu árin.

Tölvumál

2009-01-19T13:10:00.003+01:00

hafa verið ofarlega í mínum huga síðustu vikuna.
Tölvan mín litla er farin að hökta óþarflega mikið. Er nú búin að gera allt sem mér dettur í hug til að laga það, og gott betur. Vitandi = ekkert um tölvudót er kannske ekkert skrítið að ég hafi ekki getað lagað þetta sjálf. Er búin að henda tugþúsundum megabæta af óþarfa skrám og forritum sem ég þarf ekkert á að halda, bæði innan og utan alnetsins, hreinsa harða diskinn og afþýða, og leyta að veirum með þar til gerðu forriti. Án gríðarlegs árangurs.
Eitthvað hefur þetta jú lagast. Alnetið virkar sem aldrei fyrr - eftir að það er búið að koma sér í gang, sem getur tekið dágóða stund. En eitthvað hökt er enn í gangi. Sérstaklega þegar kemur að hljóði. Þetta er samt sennilega ekki hljóðkortið þar sem músin höktir líka í sínum hreyfingum. Eftir að hafa talað við ýmsa aðila um tölvur hef ég fengið nokkrar hugmyndir um hvað gæti verið að.
Þetta eru hugmyndirnar sem ég man í augnablikinu:
-Vinnsluminnið gæti verið að gefa sig. Ef svo er borgar sig alveg örugglega ekki að láta gera við það.
-Litlir vírusar gætu hafa tekið sér bólfestu í hinum ýmsustu afkimum. Það væri hugsanlega hægt að laga með því að strauja allt draslið og setja upp á nýjan leik. Sú aðgerð hugnast mér ekkert alltof vel. Finnst of líklegt að eitthvað fari úrskeiðis og dót týnist í aðgerðinni (er samt alveg búin að taka afrit af því sem ég þarf að eiga).
Geri mér líka grein fyrir að tölvur eru hlutir sem virka ekki endalaust. Og mín er búin að gera sitt gagn í næstum fjögur ár. Þrátt fyrir að hafa verið fengin á lítinn péning og vera með lítinn harðan disk.
Hugsa því að ég reyni að fjárfesta í nýrri á næstunni. Þykir fýsilegri kostur að gera það áður en gamla tölvan hættir alveg að virka. Svo getur alltaf komið sér vel að eiga aukatölvu, þó hún virki ekki alveg sem skyldi.
Þetta voru aðal-hugleiðingar vikunnar.

Það sem hefur gerst annars er:
-Ballett-tal
-Skólahljómsveitar-afleysing (norsk börn eru verr upp alin en ALLT).
-Smá próf í að veifa með prik í annarri hendinni.
-Skipulagning framtíðarinnar (eilífðarverkefni)
-Besti bjór í heimi.
-Túbu-tal
-Sjónvarp heimilisins tengt. Án míns samþykkis. 13 sjónvarpsstöðvar í boði.
-Fljúgandi pulsa utan úr geimnum. Í brauði.
-Kampavínspartý.
-Íslendingar í bænum.
-Eyrnatappatónleikar.

Jólatrésskemmtun og stríð

2009-01-11T19:05:00.002+01:00

númer 3 var í dag. Þá er bara ein eftir. Á morgun.

Missti víst af svaka hasar á einni slíkri skemmtun í gær. Hjá frímúrurum.
Þar mætti fólk til að mótmæla ástandinu á Gaza. Og hvað ákváðu mótmælendur að gera? Jú, búa til svipað ástand í sínum heimabæ. Það var semsagt brotin rúða, og síðan sprengdir flugeldar. Innum gluggann. Á jólatrésskemmtun þar sem fyrir voru um 200 börn!
Frábær leið til að mótmæla krakkar.
Frábært.
Sem betur fór var skemmtunin á annarri hæð hússins þannig að fólk innandyra skaðaðist ekki af þessum sökum. Þegar löggan kom voru mótmælendur sumir komnir inn, þannig að táragasinu var sprautað á mannskapinn. Það þurfti svo að lofta út áður en hægt var að sleppa jólatrésskemmtana-gíslunum út.

Hér með er ég formlega á móti mótmælendum.
Læti skapa bara meiri læti sem skapa meiri læti sem skapa meiri læti... og svo framvegis.

Héðan í frá ætla ég að mótmæla mótmælum með því að vera heima og gera ekkert. Þannig legg ég mitt að mörkum til að draga úr látum heimsins.

Nýtt plan

2009-01-09T19:42:00.002+01:00

Stundaskráin mín inniheldur öllu færri tíma en síðastliðin ár. Eða fjögur fög. Þar af tvö sem eru á nákvæmilega sama tíma þannig að ég get bara mætt í annað, og eitt sem gekk eitthvað erfiðlega að finna kennara í, þannig að það verður sennilega kennt í þremur námskeiðum síðar á önninni.
Eftir standa því tveir kúrsar. Samtals þrír klukkutímar í viku. Plús einkatímar hjá þremur mismunandi kennurum.

Ég hef svosum nóg að sýsla. Það er ekki það. Þegar hér er komið við sögu í náminu er bara ætlast til meira frumkvæðis nemenda. Þannig að nú er þörf fyrir að gera gott plan, sem aldrei fyrr, svo maður lendi ekki í að sitja með hendur í vösum alla önnina og ætla svo að gera ALLT daginn fyrir sumarfrí.

Ætlaði að nota daginn í dag til að gera hið fullkomna plan fyrir næsta eina og hálfa árið.
Mér tókst ekki einu sinni að skipuleggja morgundaginn almennilega.
Ótrúlega lélegur árangur.

En ég spilaði hins vegar á einni jólatrésskemmtun í dag. Og einni í gær. Ekki á sama hljóðfærið, þannig að ég var að sjá nóturnar mínar í fyrsta skipti í bæði skiptin.
Stemming.
Þá eru bara tvær jólatrésskemmtanir eftir.
Jeij.

Nýtt líf?

2009-01-06T19:06:00.002+01:00

Kom aftur til Útlandsins í dag.
Byrjaði á að hitta stúlkuna sem dvaldi í íbúðinni minni í jólafríinu, og tók við lyklavöldum. Spjallaði aðeins við hana, og hún minntist aðeins á að hún hefði skilið eftir smá dót handa mér og breytt aðeins.
"Smá" og "aðeins" eru ekki alveg orðin sem ég hefði notað.
Hér í híbýlum mínum er mjög margt ekki einsog það var. Fékk nett sjokk þegar ég kom inn um dyrnar og ALLT var öðruvísi. Húsgagnaskipulagi hefur verið umpólað gjörsamlega og þetta "smá dót" er sjónvarp, agalega "fancy" lampi, rauð pottaplanta og nýtt rúmteppi. Svo eitthvað sé nefnt. Í tuttugu fermetra íbúð breytir þetta ansi hreint miklu. Þannig að nú líður mér eins og ég búi í innlit-útlit þætti.
Ætlaði fyrst að breyta strax í einsog þetta var, en hef tekið þá ákvörðun að bíða með það í nokkra daga (og þá verð ég pottþétt löngu hætt að pæla í þessu - þannig að þetta verður örugglega svona þar til ég flyt út... eða næsti leigjandi breytir fyrir mig).

En hvað í andsk... hef ég að gera með sjónvarp og rauða pottaplöntu?

Nýtt ár

2009-01-02T18:12:00.002+01:00

Komið nýtt ár og læti.

Til hamingju með það.

Bófi?

2008-12-23T17:04:00.003+01:00

Ekki voru óhöpp fjölskyldunnar upptalin þessa helgina.

Móðirin fór í Kaupfélagið og tapaði veskinu sínu. Var hún sannfærð um að óprúttinn aðili hefði hnappað því í vefnaðarvörudeildinni.
En hver stelur veski af eldri frú í vefnaðarvörudeildinni í Kaupfélagi úti á landi?

Innan fjölskyldunnar fór fram veðmál, hvar veðjað var hvort umrætt veski myndi skila sér. Ég hélt ekki, en foreldrarnir væntu þess að veskið kæmist aftur til rétts aðila.

Sem það og gerði.

Í gær fór móðirin í Kaupfélagið, og viti menn, veskið hafði fundist. Í mjólkurkælinum. Með öllum verðmætum innanborðs. Ætli sú gamla hafi ekki bara ákveðið að leggja veskið frá sér á þennan prýðisstað í verslunarferðinni.

En ég tapaði rauðvínsflösku í veðmáli fjölskyldunnar.

Móðirin fær sko ekki að fara fleiri eftirlitslausar ferðir í Kaupfélagið meðan ég er í foreldrahúsum.

Annars er allt gott að frétta héðan heimanað.

Gleðilega jólahátíð.

Bæ blái bíll

2008-12-19T18:41:00.004+01:00

Hitinn í húsinu komst í lag í gær, en hálkan var víst ekki alveg farin.

Föður vorum tókst allavega að rúlla bifreið sinni útí móa, 1,25 hring, hvar hún endaði sinn starfsferil. Bíllinn er semsagt alveg í maski, allar rúður brotnar og allt beyglað, er mér sagt. Er ekki búin að sjá gripinn.
Faðirinn slapp hins vegar allskostar ómeiddur. Fékk pínulitla skrámu á kinnina og glerbrot í hárið. Mjög vel sloppið miðað við afdrif bílsins myndi ég segja.

Búið að moka oní skurðinn fyrir utan húsið, þannig að nú kemst maður út eins og ekkert sé.

Hér eru því allir glaðir.
Nema blái bíllinn.
Hann er dáinn.

Fréttir vikunnar

2008-12-18T16:56:00.004+01:00

Manndrápshálkan entist ekki lengi í þetta skipti. Sem betur fer. Og nú er snjór og indælis veður með frosti og logni og björtu uppá hvern einasta dag. Prýðilegt alveg hreint.

Einhverjum mönnum þótti það afar góð hugmynd í þessu árferði að grafa skurð fyrir utan húsið. Það gerir það að verkum að erfitt er að komast lengra út úr húsi en rétt út fyrir dyr.
Þessi gröftur hefur ennfremur aukið aðeins á spennu hverdagsins:
-Á laugardaginn var kaldavatnslaust í nokkra tíma. Notaði tækifærið og smakkaði vont nammi. Eitthvað víetnamskt ógeð sem heitir "Khua Thaoui" eða eitthvað álíka. Lítur út eins og lakkrís en er EKKI þannig á bragðið. Ekki besta hugmynd í heimi að smakka vont nammi þegar ekki er hægt að fá sér vatn á eftir.
-Á sunnudaginn virkuðu ekki ofnarnir. Manni pípari kom og reddaði málunum með því að skrúfa aðal-ofnakranann í kjallaranum á fullt. Gott mál.
-Á mánudaginn var rafmagnslaust í smástund. En það var nú bara stutt.
-Á þriðjudaginn var kominn lítill heitur hver rétt fyrir ofan tröppurnar. Voða sætt, en örugglega ekkert rosalega sniðugt.
-Í dag hefur ekkert heitt vatn verið fáanlegt í húsinu. Sem þýðir ennfremur enginn hiti á ofnunum. Aftur. Og nú, síðdegis, er alveg byrjað að vera dáldið kalt inni. Enda sjö stiga frost úti. Vona bara að heita vatnið komi áður en nóttin kemur. Er ekki alveg til í útilegufílinginn á þessum árstíma.
Gröfumennirnir eru örugglega að leggja sitt af mörkum. Þeir eru allavega að grafa meirihluta sólarhringsins. Ekkert atvinnuleysi þar á bæ.

Þetta voru helstu fréttir vikunnar.

Mannréttindi

2008-12-10T15:29:00.004+01:00

Síðan ég kom hingað austur hefur veðurfar verið með besta móti. Frost, ekki mikið rok (jafnvel logn af og til) og snjóalög með meira móti, sem gerir birtustig bærilegra meðan dagsljóss nýtur við.
Nú er hins vegar komin hláka, og er spáð meira af slíku næstu daga.

Þegar maður er staddur annarsstaðar en á Egilsstöðum city, og spáð er hláku hugsar maður: "oj, en fúlt". Þegar maður er staðsettur hér í bæ er hugsunin meira: "NEEEEEI". Hér þýðir hláka nefnilega bráð lífshætta um leið og fæti er stigið út fyrir dyr.
Fór í hættuför í kaupfélag staðarins áðan og svitnaði af áreynslunni við það eitt að halda mér á löppunum þessa nokkur hundruð metra. Mætti einni heldri frú á heimleiðinni og gat ráðlagt henni hvar hættuminnst væri að ganga. Það var góðverk dagsins. Vona bara að umrædd frú lifi ferðalagið af.

Þetta manndrápsástand varir að jafnaði um helming vetrar hér í bæ.

Mér þykja sjálfsögð mannréttindi að geta farið út án þess að eiga það á hættu að löppunum sé kippt undan manni fyrir tilstilli æðri máttarvalda.

Á heimaslóðum

2008-12-04T14:20:00.002+01:00

Þá er maður mættur í foreldrahúsin. Hress að vanda.

Ferðalögin gengu vel öll með tölu: Útland - Ísland - Sveitin (takk kærlega fyrir skutlið Þórunn Gréta) - Höfuðborgin - Egilsstaðir City, hvar ég mun dvelja fram á nýja árið.

Hef verið alnets-sambandslaus í rétta viku, og hefur það orsakað gríðarlegt tölvupóstflóð sem þarf að komast í gegnum. Það sem af er þessum degi hefur farið í það. Sé ekki fram á að vera verkefnalaus hér á landsbyggðinni, þar sem ég hef tekið með mér töluvert af skóla- og vinnuverkefnum. Vona að ég nái að klára sem mest áður en haldið verður aftur til Útlandsins.

Lenti í tölvuveseni meðan ég dvaldi í Höfuðstaðnum. Einmitt að morgni dagsins sem átti að fara í tölvuvinnu (auðvitað). Sá dagurinn fór því mestallur í heimsóknir á hin ýmsustu tölvuverkstæði.
Afar áhugavert að sjá mismunandi nálganir á viðfangsefnið. Var sjálf nokkuð viss um að hleðslutækið væri bilað. Á fyrsta verkstæðinu var tölvan sjálf úrskurðuð látin. Það þóttu mér ekki góðar fregnir og við tók nett taugadrulla af minni hálfu. Ákvað að leyta annað og fá annað álit á sjúkdómsgreininguna. Þar á bæ var tölvan hins vegar úrskurðuð sprelllifandi (bara sofandi) og hleðslutækið með undarlegan geðsjúkdóm - þar sem það sýndi öll merki um að vera lifandi þrátt fyrir að neita að veita rafmagni í tölvuna. Þetta þóttu mér afbragðsgóðar fregnir, og fór á þriðja staðinn til að festa kaup í viðeigandi hleðslugræju. Þar á bæ þurfti ég nánast að beita hörðu til að fá að kaupa varahlutinn, þar sem starfstúlkan sagði ekkert að geðsýkta hleðslutækinu og vildi láta leggja tölvuna inn til frekari rannsókna.
Að lokum tókst að sannfæra stúlkuna um vafasama fortíð hleðslugræjunnar og heilbrigði tölvunnar. Nýtt hleðslutæki fékkst keypt og allir voru glaðir.

Þetta gerði það hins vegar að verkum að ér náði nú ekki að klára alla þá vinnu sem ég ætlaði að skila af mér meðan ég dvaldist í Höfuðstaðnum (skilaði samt mestu), og ekki náði ég heldur að hitta allt fólkið sem ég ætlaði mér.

Hins vegar skilst mér að margir hafi hugsað sér að heimsækja heimaslóðir hér eystra í jólafríi komandi.

Hverjir koma?
Réttupphend

Tilkynningar

2008-11-27T19:45:00.002+01:00

Kem til Íslandsins á morgun.
Hér eru nokkrar tilkynningar.

Þórunn Gréta: Mundu deitið okkar á morgun eftir vinnu.

Systkini: Mun hafa samband við eitthvert ykkar um helgina til að forvitnast um plan sunnudagskveldsins.

Allir aðrir á Íslandi: Sjáumst örugglega einhverntímann næsta mánuðinn.

Allir í Útlöndum: Vonandi hafiði það sem best hvar sem þið eruð.

Búið að vera endalaust stress síðustu daga.
Enginn tími til að blogga.
Sjáumst.

Stress

2008-11-23T17:40:00.004+01:00

Það má með sanni segja að þessi helgi hafi verið andstæða síðustu helgar hvað varðar svefnmunstur. Eyddi meirihlutanum af síðustu helgi í bælinu, þessa helgina er ég búin að sofa innan við 6 tíma.
Taugaveiklunin náði hámarki þegar ég spratt fram úr rúminu klukkan hálfsex í gærmorgun til að gera verkefni. Klukkan hálfsex á laugardagsmorgni... þá er maður stressaður. Var dugleg allan daginn og fór svo á Jethro Tull tónleika, heimsótti öldurhús og fór í eftirpartý.
Afkastamikill (og laaangur) dagur og frábært kvöld!
Vaknaði svo í dag eftir örfárra tíma svefn.
Snemma að sofa í kvöld. Ójá.
Burtséð frá stress-hámarkinu var þetta hin ágætasta helgi.
Sú síðasta í Útlandinu fyrir jólafríið.

Málimál... eða ekki

2008-11-19T18:55:00.002+01:00

Var litið út um gluggann í upphafi vikunnar. Og skyndilega fannst mér ég sjá óvenju skýrt. Allt var miklu meira í fókus en venjulega. Mjög skrítið. Þangað til ég fattaði að það var búið að taka netið sem hefur hangið utaná vinnupöllunum nánast síðan ég kom hingað eftir sumarleyfið.
Degi síðar voru vinnupallarnir farnir líka. Þessir pallar voru upphaflega settir upp til að spasla og mála húsið að utan. Það átti að taka 2-3 mánuði, og nú eru jú einmitt þrír mánuðir síðan pallarnir voru settir upp.
Einhvernvegin finnst mér samt að það hafi eitthvað gleymst í þessum framkvæmdum.
Einsog til dæmis að mála...
Spes.

En allavega. Búið að vera geðsýkislega mikið að gera síðustu daga. Var að kenna í gær og fékk útlenska péninga að launum (éss) og er þessa stundina að rembast við að klára lokaverkefni, sem ætti að gefa af sér þónokkuð margar námseiningar (sem er einmitt forsenda fyrir efnahagslegu öryggi á næstu önn - þannig að eins gott að maður nái).

Skilaboð til Sóleyjar:
Þurfti að fresta tónleikunum fram í júní, þannig að taktu frá helgina ellefta til þrettánda júní; tónleikar mánudaginn 14.
Tvöþúsundogtíu altso. (Um að gera að skipuleggja sig)

Nýliðin helgi

2008-11-17T18:49:00.003+01:00

Sjaldan hefur helgi farið jafn gjörsamlega í vitleysu.

Fyrri helmingur laugardags fór í lúðr.
Seinni helmingurinn fór í óhóflega drykkju. Þessi kreppa á Íslandi er alveg að gera úraf við mann í drykkjumálum. Hérlendir vilja vera góðir við fólk frá kreppulandinu og keppast því við að hella í mann áfengi (eins og maður hafi eitthvað gott af því...).
Sunnudagurinn fór að mestu í rúmlegu. Svakalegustu drykkjueftirköst í manna minnum. Engin uppköst þó.

Græddi þó aðeins meira en allt þetta áfengi á laugardagskvöldið. Tókst að finna traustan leigjanda í íbúðina mína meðan ég er íslendis í jólafríi, og skaffaði mér frímiða á Jethro tull tónleika næstkomandi laugardag. Ég heppin.

Finnst ég hafa komið út í plús eftir þessa helgi, þrátt fyrir sunnudaginn.

Tvær vikur

2008-11-14T15:40:00.002+01:00

í jólafrí. Já, það byrjar snemma þegar engin eru prófin.
En það þarf bísna margt að gerast á þessum tveimur vikum. Allnokkur verkefni sem þarf að skila, og vinna sem þarf að vinna. Dagurinn í dag hefur farið í kvíðaröskun yfir verkefnamagni komandi tveggja vikna. Léleg nýting á tímanum það.
Og morgundagurinn fer í lúðraæfingu- og tónleika. Sá dagurinn mun því heldur ekki nýtast sem skildi.
Þá eru hreinlega ekkert mjög margir dagar eftir. Þarf jú eitthvað að mæta í skólann suma dagana og er búin að taka að mér afleysingakennslu í einn dag.
Held að restinni af þessum degi sé best varið í að gera plan fyrir næstu tvær vikurnar. Skriflegt.

Og það ætla ég að gera.

(Þetta var örnámskeið í skipulagningu)

Tvær eilífðir

2008-11-10T18:14:00.002+01:00

Fór í næstsíðasta Dana-talninga-tímann í dag. Hann var ansi lengi að líða, að venju. En nú er bara einn eftir (þ.e. þrír óendanlegir klukkutímar).
Uppáhaldstalan mín á dönsku er átta. Hún er nefnilega borin fram "oooooðe", á meðan aðrar tölur eru bara með einn sérhljóða í röð. Skemmtilegt.
Undir lok tímans komu nokkrir menntaskólanemar að fylgjast með. Það er opin vika í skólanum, og þá koma krakkar í heimsókn sem hafa hug á að sækja um nám í skólanum. Efast um að þessi grey hafi áhuga á því eftir heimsókn í þennan tíma... og þó. Þau flissuðu nú eitthvað yfir Dananum.

Eftir þessa þrjá óendanlegu tíma, tók við hópverkefni sem unnið var í samvinnu við tvo bekkjarfélaga, og sameiginlegan vin okkar allra, Max. Það tók aðra þrjá óendanlega klukkutíma. En við kláruðum allavega verkefni vikunnar, sem á ekki að skila fyrr en á fimmtudaginn, og er ég því hæstánægð með árangur dagsins.

Þrátt fyrir að hann hafi tekið tvær eilífðir.